الفصل 4
قد يصنع الحب احلى المعجزات لكنه ايضا قد يصنع الكوارث
ليت ربي ماكتب لحظة وداع
ولافراق ولادموع ولاضياع
ليت كل الناس خل مع خليل
وكل ماقيل
النهاية بين الاحباب الرحيل
قلت احبه حيل
لو يوقف لحظة الفرح الزمان
والمكان عيونك انت احلى مكان
في يدي يديك والحاسد ذليل
وان غدت كل الاماني في يدي
ابتدي مع كل لحظة تبتدي
اعشق الدنيا مثل طير جميل
اه ياحلو الامل والذكريات
والسعادة ماتجي بالامنيات
صبحها يبطي وانا ليلي طويل
في اللحظه اللي كنت بدخل المكتب حسيت اني مشلوله من شوفته مادري ليش فكرت اني ماشردت منه بدون ماخبره الا لانه اكيد بيأثر علي وبيخليني اتراجع ..هالانسان فيه سيطرة مو طبيعيه وصعب اني مااتأثر بنظراته ..نظرات كانت ماتشوف غيري والحين تطالعني ببرود وهدوء مو طبيعي ..نفسي توسوس لي اني امشي واترك المكان وعقلي يقوللي كافي قلة حشيمه لنفسج وللي حواليج دخلت وقلبي ينادي بشوق ايام ماظنتي ترجع وظنيت ببالي انه بيعاتبني وبياخذ يدي بيده وبنتصالح (( انا مو ظنيت انا كنت ابي هالشي يصير ))من كثر شرودي ماكنت منتبهه ان في احد غيرنا بالمكتب ومباشره صكيت الباب وراي وقلت بهدوء ورجا ((عادل ليش تعاملني بهالطريقه ,, اذا مو علشاني تكفى تراعي شعور ابوي ))وكنت انطره يطالعني بس عيونه كانت وراي على الكراسي اللي بالزاويه وويهه كان جامد جنه من صخر وفجأه تكلم ينادي احد وراي ويقولله................
: محمد ..تعال سلم على ليلى ..
منهو هذا محمد ..وفريت راسي ابي اعرف هالمحمد بس ماعرفته..واحد طويل وعريض ولابس بدله بدون نكتاي وقميصه مفتوح عندالصدر
ماعجبتني نظراته كان يحرك عيونه ببطء علي من راسي لين ريلي وانا كنت لابسه تنوره قصيرة وحسيت انه نظراته وقحه زياده عن اللزوم طالعته بغضب وسالته بوقاحه اكثر من وقاحة نظراته ((كملت رسم الخريطه ؟؟؟؟))
عيونه جت على عادل واحس انه انتبه وابتسم بكل برود وقال لي((بحكم كوني مهندس انا احب اصمم الخرايط وما انقل الاشياء المعروضه بكل مكان )) حسيت اني بكفخه على ويهه لولا تدخل عادل وقال له
: محمد رجاء لاتستخدم هالاسلوب مع ليلى ولا نسيت انها بنت خالتك..
اي ولد خاله هذا اللي ماعرفه
محمد: ليش اهي تعرفني حتى ..ثم انها بنت خالة امي مو بنت خالتي
عادل : خلاص عاد ...والحين ابيك تعذرني ولا تحاتي نسبتك من الارباح كل شي بيكون موثق مثل ماتحب
محمد:عموما الحمدالله عالسلامه ليلى وانا كنت ماشي فعلا
طالعني بنظره فيها سخريه ومشى ...والله يقهر هالريال
لما طلع محمد من المكتب هب عادل فيني واستلمني صراخ
: انتي شفيج ..لا حيا ولا مستحى ..ترادديين ريال غريب وكأنج ماسويتي شي
: ليش انا شسويت
:انتي شفتي شنو لابسه ....ولا تبين الناس تشوف المنكر وتطنش..ولا لان ماعندج اخو يغار على عرضه ومستغله طيبة قلب عمي تمشين جذي (( مالج حسيب))
: اللي انا لابسته محترم ومالي شغل في تفكير الناس
:ممتاز عيل خليهم يفكرون على راحتهم ويشكون حتى في اخلاقج مادمتى حابه تلبسين هاللبس الفاضح
حسيت اني ابي ابكي من كلامه وسكت وبحلجي غصه وماقدرت ارد عليه
عادل:يابنت عمي ..اذا الزمن ماكتب لنا انا نكون لبعض مو معنى هالشي اني ابيج تظلين جدي ..يهمني وايد اني اشوفج عروس ومثل ما اهتم بسلمى ودلال يهمني بعد اسمع انج سعيده
:وفر على نفسك ياولد عمي هالكلام ..انا مابي احد يشغل نفسه فيني ..ابي بس تخلوني بحالي ..ياخي ولاتحاتي ابوي ..تزوج ولايهمك
ضحك عادل وكانه سمع اخر نكته وقال لي
: واي غبي قال لج اني مابي اتزوج علشانج او علشان عمي...
:انت قلت لللللللامك هالكلام ووو
: لحقت سلوم وصلت لج الاخبار..مشغلتها جاسوسه علي ..عيل سمعي يابنت عمي ..اول ماشردتي مثل الحراميه من الديره ..انا ماصدقت وظليت اقنع نفسي انج بتردين بسرعه ندمانه بس انتي طولتي واشوي شوي ابتديت احس ان لوماكنتي فعلامرخصتني مارحتي ((وقلت بقلبي مانتي احسن من عمج اللي شرد وخلا لي 3 اخوان اربيهم وام اراعيها))
ومن يومها يابنت الناس وانتي اختي ومو انا اللي انتقم من احد بهالاساليب والحين ابيج تردين بيتج وتقررين تغيرين اسلوب لبسج وتسترين على نفسج وعلى ابوج وتنطرين نشوف لج ولد حلال ياخذج ويرتاح بال عمي وارتاح انا بعد من هم اخت من خواتي
مادري شصار بس اللي اعرفه اني ضايعه وماحسيت الا وعادل ماسك يدي وماخذني للسياره..وصلني للبيت وانا ساكته ومانطقت ..دخلنا وامي وابوي بالصاله كان الوقت عصر والجو حلو وهم كانو بيطلعون الحديقه ..لما شافو عادل داخل معاي امي قامت تلولش وتيبب وتقول الحمدلله اللي ردكم لبعض
دخلت حجرتي وعادل راح معاهم الحديقه وظليت ابكي ابكي ابكي مادري متى هديت ونمت ....................
صحيت الساعه 3 بالليل الكل كان نايم نزلت المطبخ يوعانه ابي اكل اي شي يخفف من الم معدتي قعدت استرجع شريط اليوم كله ووصلت لخلاصة اني استاهل كل اللي يصير لي وحسيت اني فعلا مصدر ازعاج لامي وابوي ليش لا وهما ماصدقو يشوفون عادل داخل معاي البيت وياترى شقال لهم ...........عقب مده قررت بيني وبين نفسي اني اهدي وماسبب لاهلى شوشره لا بلبسي ولا بعلاقتي مع عادل اللي انتهت كليا
حتى اني شريت هدوم اكثر حشمه مع اني ماني مقتنعه ان الهدوم اللي عندي فاضحه ومرت الاسابيع اللي عقب هاليوم هاديه والظاهر ان الوالده درت باللي صار ومافتحت معاي موضوع عادل او اي شي ثاني ...وماعدت اشوف عادل وحتى سلمى ماقامت تتصل فيني
.انعرضت على الشركه مجموعة صفقات من شركه ثانيه لها فروع في اماكن عديده بالخليج وتخطط تفتح فرع بالديره بصفة الشراكه وكان لازم اسافر اللى دبي والكويت ويمكن حتى ماليزيا اذا استدعى الموضوع بس المشكله شلون بقنع ابوي بكل هالسفرات وشنو بيكون رده
لما فاتحت ابوي بالموضوع زعل وحمق وقال لي انه موب راضي اسافر مادمت تحت عينه وانه مايبي الناس تاكل ويهه (( بعد بعثه وقلنا تحت عيون الدوله ومافيها شي بس سفرات وطلعات وعزايم وبروحج لا)) انا مو طرطور بهالبيت
كلمته وترجيته وحاولت معاه وعقب دموع ورجا قال لي بكل هدوء
ابوي: انا مستعد اوافق لكن بشرط
: اشرط يبه الي تبي