الفصل 1
سمر تشوف نفسها على المنظره: واااو (بدلع وغرور): يوم عن يوم تحلوين
عطت بوسه لنفسها .. وضحكت
طلعت من غرفتها ولابسه وقاية البيت ..
شافتها أمها اللي كانت يالسه وفارشه بضاعتها : على وين؟
سمر بدلع: يمه وين بروح يعني ؟
ام فاهم:زين تعالي شوي شمي هالعطر وعطيني رايج ؟
سمر: اوجج
ام فاهم: يقولون إن شاءالله
سمر: what ever
خذت العطر وشمت ريحته: واااااااااو مومي وايد حلوه باخذه زين
سحبته عنها ام فاهم: وين تاخذينه هذا حق البياعه
سمر: أووو يمه هيه الا غرشه وحده مب خاسره شيء
ام فاهم: يوم بكون من جيبج زيك الساعه قولي مب خاسره شيء
حاست سمر بوزها: مب مشكله
تحركت بس ام فاهم قاطعتها: سمرو يوم بتشوفين ام طلال خبريها إنه البضاعه اليديده وصلت
سمر مب مهتمه: بفكر
ام فاهم : شو بفكر بعد؟ سمر حسني ألفاظج عن اقوم لج
سمر تجاهلت امها وطلعت ..
وهي طالعه اصدمت بأخوها علي اللي ياي مسرع
سمر: عمى
علي: في عينج
سمر: في عينك انت قول آمين
علي:لا والله تبيني أدعي على عمري لا عمري استريحي
سمر: وخر عني لاه
دزته وطلعت برع
علي يكلم امه: يمه هذي بنتج شايفه نفسها على شو ؟
ام فاهم: خلك منها ... واسمع كلامي ابغيك تسوي لي دعايه عن بضاعتي اليديده
علي: والمقابل
يلس بقربها ..
ام فاهم: بتلقى على اتعابك
علي: فديتح والله لو مب محتاج كان ما طلبت منج المقابل
ام فاهم: تراكم عيال هالأيام ما تسون شيء ببلاش
علي: هههه الحاجه يا يمه .. بس اعتمدي علي بسوي لج دعايه حتى مال التلفزيون ما اكتشفوا عنه
ام فاهم: خخخخ بنشوف إبداعك
سمر متعوده تدخل من غير ما ادق الجرس
ففتحت الباب بعدما سحبت الحبل ..
دخلت البيت .. صح إنه كبير و واسع لكنه بيت شعبي وقديم نوعا
بس أهل هالبيت رمموا البيت وخلوا يلاءم هالعصر
وألحين سمر في بيت بو الحاج صالح
وبتعرفون مع سرد القصه منو يسكن في هالبيت وعلاقاتهم باهل سمر
بس بعطيكم نبذه بسيطه
يوسف (الجد) / الحاج صالح (الجد)
اصدقاء الطفوله
الأثنين تزوجوا وانتقلوا بنفس الوقت وبنفس الفريج وحذال بعض بعد
يوسف توفى ترك حرمته عويش (الجده) اللي توفت الشهر اللي طاف مرض السرطان وعندهم ابن اسمه سالم
اللي تزوج سكينه ويابوا فاهم يدرس برع ومتزوج
وسمر درست سنتين في التقنيه و وقفت
علي ثالث ثانوي علمي
وصداقة يوسف والملقب بحاج صالح اثمرت صداقه قويه
بين سالم و عبيد
وألحين بكتفي إنه عبيد امه متوفيه ... ومع سرد القصه بتفهمون عن العايله زين ما زين
نروح عند لاعب كابتن ماجد مب قاعده اتمصخر اسمه ماجد بس ينادونه مايد احياننا
ألحين قاعد يلعب بالكوره في الحوي ويسوي حركات بالكوره مره على الراس ومره بالكوع عاد تعرفون حركات الشباب ..
المهم دخلت سمر بعدما فتحت الباب ... إلا توصلهـا كوره على ويهـــا
لكن عينها إلي تعور ...
الحبيب كابتن ماجد .. يغى يقيس قوة الدفع اللي عنده فمسك الكوره وفرها بقوه صوب الباب اونه بصك الباب وبترجع
ويوم انفتح الباب حاول ينبه بس ماشيء فايده صار اللي صار والضحيه سمر
ماجد: سمر تعورتي
سمر ترفع ويها ومغطيه عينها بيدها وبكل غضب: تعورتي؟ اونك عاد
اكيد تعورت ..وين عبالك في ملعب انت
ماجد: انتي الغلطان كان دقيتي الجرس قبل لاتدخلين
سمر: إنته إيه عليك غباء مب طبيعي من متى تحيدني ادق الجرس يوم ادخل بيتكم
ماجد: سمر عن الغلط
سمر: وخر عني لاه .. مصدق نفسه كابتن ماجد اونه
راحت عنه تتحرطم
عاد ماجد معصب ليش قالت عنه غبي .. وهي رايحه
شل الكوره وفر عليها ... صكت ظهرها
صدت وراها : يا حمـــار
ضحك عليها ... ويوم شافها بتشل الكوره.. ربع بعمره .. عاد هو ما حاسب الباب مصكر من جذي يوم صد ورا عشان يشرد ... صكع (انصدم) بالباب
يفرك جبهته: آخ
سمر: تستاهل يا ويه النحس
الكوره كان بيدها .. ففرته بأقوى ما عندها .. وصكت راسه
ركضت للصاله و ضحكه شاقه حلجها
ماجد يده على الجبهه ويد على الراس: سمر دواج عندي
ماجد (ولد عبيد) وقاعد بطالي في البيت .. بس شاطر في الكوره
وشاطر يلعوز سمر .. اصلا ما يمر يوم من غير ما يتضاربون .. مب حبا لبعض
لا هم صدق ما يطيقون بعض
والقصه بدأت يوم سمر وماجد كانوا في الروضه ... وماجد كان شقي وايد
فسرق أكلها المسكينه وخلاها بيوعها تصيح وتتطالع اللي ياكلون ههه
عاد تخيلوا حالتها كيف كان ... ولا بعد الطيب ماجد يالس حذالها ياكل جدامها ولا يعزمها وسمر طلع عندها كرامه وهيه صغيره تعرف الكرامه خخخ
وما طلبت منه شيء
ويوم رجعت البيت عطته بخمس .. وبعد الغدى شلت بعمرها وراحت لبيتهم (قلت لكم من صغار هم مع بعض ما شيء أي مستحى بينهم خخ)
عاد سمر راحت عند بنت جيرانها عايده اللي هي اخت ماجد اكبر عنهم بسنه
يعني عايده بأول ابتدائي
شلت سمر سيكلها وعلى بيت الحاج صالح ..
وهي داخله شافت المجرم ماجد بيده علبة الأكل مالها ... وقاعد يأكل القطاوه ..
تركت سيكلها بصوب وراحت عنده
سمر: ماجد
ماجد خاف .. فخش العلبه وراه: شو فيج ؟
سمر: هذا مالي صح؟
ماجد اونه قوي: هيه مالج .. (فراه عليها) وركض
سمر شوي وبتصيح .. إلا صاحت قولوا
عاد في يوم الثاني .. وفي الروضه
لا تحطون في بالكم صغار وما عندهم مخططات ترى يهال ما عادوا مثل قبل
دخلت سمر الصف ويلست حذال ماجد ..
وما كانوا يتكلمون اونه
بس في الفسحه سمر طلعت العصير وتمت تشربه جدام ماجد .. عاد ماجد خاطر فيه ألحين ..
بس هو يعرف إنه سمر زعلانه منه وما بتعطيه
وسمر كانت تعرف شو ما يصير بي بيطلب منها
راح ماجد عندها عاد شوفوا المصلحجي: شمر إنتي زعلانه
سمر مبوزه: هيه
ماجد:خلاش أنا آشف
سمر أونه بعتب وعاد متقطع الكلام: أنت أنـ ـت ليش سـ ـوي سويت
جذي أنا خبرت عليك أمي وقالت بتضربك
ماجد يبرر موقفه:إنزين ابوي يقول إلي يشامح وايد زين يكون
سمر: يعني إذا سامتحك بكون زينه عنك
ماجد هز راسه: هيه يالله عطيني عصير (قوة ويه)
طلعت سمر من شنطتها عصاير وعطته
ماجد: اللــــــــــه عندي وايد عصير
شل العصاير بيده: يالله لوحي انا ما أهبج
راح من عندها .. وسمر حطت يدها على حلجها وتمت تضحك
في الصف
ماجد يتحرقص في مكانه يبى يروح حمام بس مستحي يقول ... ويوم قال للمعلمه ما رضت تخليه : وليش ما رحت في الفسحه (خفي عليهم يا ابله خخخ)
ماجد خلاص مب قادر يتحمل .. اكثر
فهمس لسمر: شمر ابى اروح الحمام
سمر: امي تقول يوم نشرب وايد عصير يستوي جذي
ماجد يصيح على السايلنت
لين ما حست سمر بشيء ينزل من الكرسي
سمر : أوووي ماجد شو سويت
ماجد يصيح ويتكلم: انا قلت لها
سمر: ههه احسن
ماجد قعد يضربها
المعلمه: ماجد
ماجد يوم شاف المعلمه اطالعه و معصبه ترك سمر
سمر: ابله ماجد خيس الكرسي
المعلمه: ماجد لا يكون سويتها
ماجد منزل راسه ودموع اربع اربع
يوم راحت عنده المعلمه: أخ عليك يا ماجد ..
يوم شاف كلهم بدأو يضحكون عليه .. تم يصيح بصوت عالي .. وسمر ناقعه من الضحك عليه
بس من ذاك اليوم بدأ الحرب بينهم .. ومحد يطيق الثاني
دخلت سمر على عايده اللي كانت داشه على النت
عايده: وييي سمر وش فيه عينج محمره
سمر بقهر: اخوج السخيف والعبيط فر علي الكوره
عايده: هههه ماجد
سمر: في احد غيره كريه ما احبه بذبحه
عايده: خخخ شوي شوي يا اختاه
سمر: شوفي شو سوى بعيوني بغى يشوه جمالي
قامت وراحت صوب المنظره: واااي عليه زين ما تضرر وايد
عايده: أقووول بس عاد تراج وايد مصدقه بجمالج
سمر بدلع: من حقي
عايده صدت على الكمبيوتر: ههه الله يهديج
راحت عندها سمر: إلا شو قاعده تسوين
عايده: ادور على بحوثات ومب لاقيه شيء يعجبني
سمر: متفيجه انتي
عايده: حياتي ابى انجح أنا
سمر: بعد متفيجه
عايده: أنتي اللي متفيجه بذمتج مب ملانه ماتسوين شيء قاعده لا شغله ولا مشغله في البيت
سمر: الحقيقه لا .. عاجبتني حالتي ههههه
عايده: على راحتج