الفصل 4
هدت الأنفس بعدما قعدوا الشباب و البنات برع مفرشين لهم الحصير
والكبار داخل ...
علي: ملل صح
زايد: هيه وايد
خليفه: شو نسوي؟
ماجد: ما اعرف
سمر : عندي فكره
ماجد: وتعرفين تفكرين بعد
سمر: أقول انت عبالك الناس اغبياء مثلك
ماجد: سمر
سمر: ماجد
عايده: بس دخيلكم
عبير: ما صارت ترى يالله وانتي خبرينا عن فكرتج
سمر تتطالع ماجد بنظرات اشمئزاز وردت تتطالع عبير:
انا شفت لعبه في الفلم اسمه حقيقه ولا شجاعه
هند: وكيف يلعبونه يا آنسه سمر
سمر بدلع : ثانكس
هند تحسرت إنها قالت لها آنسه: مالت
سمر قامت وضربتها
عايده: انتوا يهال؟؟ .. بذمتكم هذي حركات بنات كبار
هند: ما تشوفينها
علي: سمر بطلي هالحركات
سمر: لا والله والاخ ليش يدافع عنها معجب فيها شو
تغيرت ملامح الاثنين صج تقفطوا
زايد بغى يغير الأجواء: يالله يا ام لسان خبرينا عن لعبتج
سمر: زين يوم ذكرتني نيب غرشه ونحركه واللي بتوقف عند شخص يختار ياء يقول الحقيقه ولا يسوي شيء يتطلب الشجاعه
عايده: ومنو اللي بيطلب من اللي توقف عنده الغرشه
سمر: وين بتوقف نهاية الغرشه هو الشخص اللي بيسأل لصاحب اللي وقفت بدايه الغرشه عليه
عبير: شكله حلو
ماجد: بس يباله شجاعه وقول الحقيقه شو ما يكون
سمر: زين يوم فهمت
طالعها باحتقار .. وما اهتمت
سمر: ها مستعدين
خليفه:أنا مب لاعب
زايد: خفت شو
خليفه: لا بس ما احب المغامرات وانا اعرفكم زين اكيد بتطلبون شيء مب سهل
عبير: مب مشكله بروح ايب غرشه
سمر: اركضي هههه
بعدما يابت غرشة البيبسي
يلسوا على شكل دائره
وماجد اول واحد حرك الدائره ...
اول مره وقفت الغرشه على هند ونهاية الغرشه على زايد
سمر: يالله زايد اسألها
زايد: مستعده
هند تضحك: أكيد
زايد: حقيقه ولا شجاعه
هند:ممممم خلها حقيقه
زايد: مممم انتي تكرهين سمر؟
الكل تم يطالع هند ..
هند تطالع سمر: هيه
سمر كانت بتتكلم بس عايده قاطعتها: سمر لا تقولين شيء هذا مجرد لعبه
عبير تزيد الطين بله: إنزين هند وايد ولا شوي
زايد ادخل: هو سؤال واحد بس يسألون
علي: اشوف اللعبه قامت تشعل (يقصد سمر)
عايده: يالله ماجد حرك الغرشه
ثاني مره وقف عند عبير ومجابل ماجد
ماجد: حقيقه ولا شجاعه
عبير: شو اختار سمر
هند: وانتي كل شيء بتاخذين راي سمر
سمر: وانتي شو حارنج متغايضه على شو
خليفه: نصيحه شلوا هالاثنين ولا بدمرون عليكم اللعبه
ماجد: انتي ليش تكبرين السالفه
سمر: لازم بدافع عنها من نفس الطينه
علي: ياناس خلونا في اللعبه
عبير: خلاص خلاص بختار شجاعه
ماجد: متأكده
عبير: هيه
ماجد: عيل اصفعي سمر
الكل شق حلجه
وهند تبتسم لماجد ... عرف يلعبها صح
عايده: ماجد شو هالعبط بعد
ماجد: مب هذي قوانين اللعبه .. ولازم يتنفذ واللي مب قدها لا يلعبها .. صح سمر
سمر اطالعه باحتقار وغضب .. ما ردت عليه .. بس صدت صوب عبير
سمر: عبير شوفي شغلج
عبير: لا سمر ما تهونين علي
سمر: عبور ما بزعل وانتي بعد لا تصدقين روحج وتصفعيني بقوه
عبير رفعت يدها ... صح إنها صفعتها بس على الخفيف
ماجد: مب مشكله المره اليايه بطلب تصفعينها بقوه
سمر: على كيفك هو
ماجد: بنشوف
خليفه: انا اقول لو توقفون اللعبه هنا احسن
سمر وماجد: لا لا
طالعوا بعض .. وسكتوا
عايده: على راحتكم يالله ماجد حرك الغرشه
ثالث مره وقفت عند علي ومجابل لعايده
عايده: ها علوي حقيقه ولا شجاعه
علي: أكيد شجاعه
عايده: ممم تقدر تاخذ عصا من يدي
علي: ها؟
سمر:حلو يا عايده شوما يصير ما بيعطيه
علي: طلعتي مب هينه
زايد: ها علوي بتقدر
ماجد: يبقدر بعد الضرب اللي بياخذه هههه
خليفه: عادي علوي انسحب
علي: لا لا مب منسحب بروح وانتوا تريوني هنا
الكل: إنزين
قام علي ... وراح عند يده صالح ... شافه مشغول ويسولف مع الرياييل
والعصا حاطنه على الجانب ... تقرب شوي شوي .. وحاول يسحب العصا
بس ابوه خرب عليه: علي شو تسوي
صد صالح: علي شو تسوي بعصاتي
علي عاد ارتبك: يدي ابغي ارقص فيه مثل اللي يرقصون في برنامج الميدان
صالح: وما لقيت غير عصاتي
علي: تراها غير عن باقي العصا
صالح: اترك عنك هالسوالف وعطني عصاتي
علي ماسك العصا: يدي خمس دقايق وبس
صالح يسحب العصا: اقولك روح دور لك على غيرها
عبيد: يا ابوي علي اترك العصا انت تعرف ابوي ما يستغنى عنه
علي: عمي 5دقايق وبس
خميس: شو تباها إذا 5 دقايق وبس
صالح: عطني
علي مب راضي مره هو يسحب ومره صالح ... لين ما قام سالم عشان يضربه .. من جذي ترك العصا وركض برع
يوم شافوا ياي ويده فاضيه تموا يضحكون عليه
رن تلفون خليفه ويوم قام الكل علق عليه : هييييييييييييييه
كانوا عارفين خطيبته رحاب داقه
ابتسم وراح عنهم
عايده: يالله ماجد كمل
ماجد: اوجي
كان بحرك بس صوت ام فاهم وقفهم
ام فاهم: يالله سمر بنرجع البيت
سمر: ليش توه الناس
ام فاهم: شوفي الساعه كم ناويه ترجعين البيت
سمر: برجع مع هالسخيف
علي: استريحي أنا ألحين برجع البيت
ماجد: بي معاك وبنسهر على اللعبه
ام خليفه: ناوي تخرب الولد شو تراه وار مدرسه
علي: لا خالوا لا تحاتيني انا ذكي من غير ما اذاكر
سمر: بس عيل ... (ما يكذب الريال يفهم من غير ما يذاكر)
علي: انطبي يا السبالو يالله ماجد خلنا نروح
زايد: بي وياكم عيل
ام زايد: بالاول وصلنا
زايد: ابوي بيوصلكم
ام زايد: ابوك ناوي يتم
هند: يمه نحن بنرجع بعد
نوره: هيه دام محد بتم خلنا نرجع نحن بعد
ماجد وعلي راحوا اما سمر اول ما وصلت البيت دخلت غرفتها ... وشغلت الكمبيوتر
زايد من نفس عمر ماجد ويدرس في الكليه ... وبما إنه عليه محاضره متأخره
قرر يرد لهم ... بعدما يوصل اهله
سمر بعدما لفت على المواقع حست بالملل .. قررت تنزل وتسوي لها شاي ..
كانت بتزل بس ضحكات الشباب وقفها ..
رجعت غرفتها تلبس وقايتها ... وطلعت من غرفتها
لمحها ماجد بس ما اهتم لها ... اما علي فما خلاها تروح بهدوءها
علي: وين رايحه ؟
سمر: الكورنيش
علي ضغط على الستوب: وانتي ما تعرفين تجاوبين نفس الناس
سمر: وانته ما تعرف تسأل عدل
علي: إذا رايحه مطبخ سوي لي معاج شاي
ماجد: خلك رزين وأسألنا نحن بعد
علي: اوه سوري ... سمروا سوي لنا شاي
ابتسمت سمر: إن شاءالله من عيوني
تحركت
زايد: غريبه سمعت كلامك
علي بأفتخار: لازم تسمع في نهايه انا ريال البيت
ماجد: هههه طلعت مب هين