الفصل 32

سمر توهـــا كــانت طالعه من الحمام ... تمسح شعرها بالفوطه ...
رن موبايلها استغربت من الرقم ...
ردت عليه:الو
ماجد: هلا سمر
سمر : ماجد؟!
نست الرقم لأنها ما حفظته عندها
ماجد: سمر عندي شيء اقوله شيء قبل لا تسافرين
سمر: ماجد أنت دووم عندك شيء تقوله وتعرف محد مستفيد شيء في نهايه
ماجد: بليز آخر مره قبل لا تسافرين وصدقيني بعدين كل شخص في دربه
سمر: متأكد
ماجد: هيه
سمر: انت وين ألحين
ماجد: فوق السطح
سمر: السطح
ماجد: هيه اترياج
سمر: لا تستعبط ناوي تفضحني في الفيج شو
ماجد: تعرفين إنه ما يبين شيء وهذي آخر مره صدقيني
سمر متردده : زين بحاول
ماجد: اترياج
صكرت من عنده ... خذت وقايتها :محد مصيعني غير هذا اللي اسمه ماجد
والله ثم والله هذي آخر مره ... سامحني يا رب
طلعت من غرفتها اطالع يمين ويسار ...
ركضت بسرعه عند باب الصاله ...
صوت امها خوفها: وين سمر
خلت عمرها عاديه: امايه عايده اتصلت فيني تباني ضروري
ام فاهم: توج راجعه من عندهم
سمر: امايه وين توني انا صليت المغرب وتسبحت يعني صار وقت
ام فاهم : زين زين دامج رايحه ييـبـي من ام خليفه دخون
سمر: إن شاءالله
طلعت بسرعه من بيتهم ...
فتحت الباب وارتاحت إنه محد في الحوي ... سمعت صوته
ماجد: سمر
صدت فوق واشرت عليه يسكت
دخلت الصاله ...
سمر: كاني يايه اسرق ... استغفر الله ...
ركبت الدري بسرعه ...

ماجد: أخيرا
سمر مستعيله: بسرعه قول اللي عندك
ماجد: وانتي دووم مستعيله
سمر: انا رايحه
ماجد: لحظه إنزين
سمر مربعه يدها: يالله اتريا
ماجد: مو على كيفج تنهين حبنا بها السهوله
سمر: انا رايحه انت ماعندك شيء يديد
ماجد: اليديد إني بطيح من فوق إذا ما قلتي لي إنج تحبيني وما بتسافرين
سمر: صج سخيف عشان هذا مضيع وقتي
ماجد: بتقولين ولا لا
سمر: لا طبعا
ماجد: خلاص عيل تحملي نتائج جوابج

راح وركب على الجدار وتم واقف
ماجد: بتقولين ولا كيف
راحت بقربه وشافت تحت: بس تحت مظله يعني مب متعور وايد
ماجد: انتي صج
سمر: إذا تبى تمثل مثل عدل
ماجد: اوكي مب مشكله
مشى بعيد عن المظله
ماجد: وألحين
سمر تتطالع تحت: زين ألحين زين تقدر اطيح
يالله انا سايره
عطته ظهرهــا وهو يكلمها
ماجد: سمر صج بطيح إذا ما قلتي .. سمر
سمر تلوح له بيدها : جااااو
فتحت الباب وقبل لا تصكر : رحله سعيده
صكت الباب
ماجد: ما سوت لي سالفه
طالع تحت : مب زين الانتحار انزل احسن لي
كان بنزل بس ما أدري من وين القطوه يت وكانت تركض
لين ما يت صوبه وهو ما انتبه له
اول ما بغى ينزل ريوله طافت القطوه .. فتدحرج
ماجد: لا لا .. يحاول يوازن عمره بس ما شيء فايده طاح الريال

سمر اول ما سمعت صراخه رجعت ركض
فتحت الباب شافت ماجد مب موجود
ركضت صوب الجدار وشافت تحت صرخت : مـــــاجــــــد
مـــاجد

رجعت صوب الباب وركض عنده
تمت تنادي عليه والدموع اربع اربع: ماجد ماجد
بس ماجد ما يرد عليها

راحت تنادي عليهم ...


ودقايق الناس مجمعين صوب بيتهم ...
ام خليفه تصيح: بروح معاكم
عبيد: يا حرمه تمي انا وخليفه رايحين مع الاسعاف ..
وتعالوا انتوا مع زايد ولا فاهم

المستشفى صار زحمه ... خاصه قرب غرفة العمليات
ام خليفه لسانها ما تعب من الدعاء لصحة ولدها
عبير: سمر كيف طاح؟
سمر بس كانت تصيح .. واول ما سألتها عبير تذكرت كيف كان موقفها مع ماجد
فحضنت عايده وتمت تصيح بمراره
عايده: سمر ادعي يقوم بسلامه
عبير شكت بشيء بس ما حبت تقولها شيء