الفصل الخامس والعشرون

((راحت مرام وأفنان مع السواق على بيت أم رامي , عشان يضبطوا الرحلة والسيارات ))

أتفرقوا العيلة كلها لخمسة سيارات وهيا كالتالي :-

السيارة الأولى.. سيارة عم راضي "بي ام دبليو " فيها راضي وطنت روضة وأماني والخدامات .
السيارة الثانية .. سيارة رامي " لا ند كروزر " مو سيارة رامي بس هو أخذها عشان أكتر ناس راكبين معاه ... رامي وجمبه عبد الله و وراهم ريهام وندى وزوج ندى و وراهم مرام وأفنان وفي النص لؤي .
السيارة الثالثة .. سيارة زوج تهاني " كامري 2007" فيها زوج تهاني وتهاني و ولدها ونهى وأمل ومشاعل .((بنات خالات ريهام ))
السيارة الرابعة ..سيارة أحمد ولد خال ريهام وحبيبها كمان "سمارت سودة وعليها رسومات خطيرة مرة " فيها أحمد وأمه وأخواته وبنت عمه .
السيارة الخامسة ..نوعها " فراري أصفرر " فيها ولد خالة ريهام وأخته وأخوه .

((الكل مشي في نفس الوقت وكل سيارة كان لها ميزة خاصة بس كان الجو روعة في الصباح ))

في سيارة عم راضي ....

أماني : أبعدي الله يقرفكِ على ريحتكِ .
روضة : خير معصبة على مين هذا الكلام .
أماني : ماما ليش ما رحت مع رامي أحسن والله كلهم متونسين شوفي كيف يرقصوا مع الأغاني والوناسة واحنا عندنا سعد الغامدي .
راضي : يا بنتي ما يصير تتريقي على العلماء المسلمين مثلما قال تعال " وانه لقول رسول كريم " صدق الله العظيم .
أماني : بابا بطل كلام دين وانت تعرفني أكره الدين .
روضة : لو عدتي هذا الكلام تاني أقطع لسانك من رقبتك هيا , أقعدي زي العالم والناس .
أماني : أنا غلطانة أجبر بخاطرك وأقول أجي معاكي كان خليت لؤي يجي بدالي أحسن .

في سيارة راضي التوتر زايد مع الأسرة ..




لكن في سيارة رامي الوناسة مخلينها ومعلينها على الأخر ...
لؤي : يا سلام عليكي يا مرام في ايش تطالعي .
مرام : أشوف الدنيا .
أفنان : دحين الدنيا تنشاف من الجبل .
مرام : خليني عايشة الجو بس .
رامي : يا عمري يا حياتي .
أفنان : آمر حبيبي .
رامي : معايا كيس أكلات تبغوا .
أفنان : جيبوه حبيبي .
ندى : شوف يا عصام كيف يدلعها مو زي مالت عليا ((عصام زوج ندى أتعرف عليها في الجامعة واتزوجوا عن حب , لكن مرت سنة وضاع الحب ))
عصام : يا قلبي آمري ايش تبغي .
ندى : أه أخيراً .
مرام : صارت سيارة خاصة للعرسان ما باقي نعملها سراير عرسان .
ندى : مرام ما كأنك زودتي في الكلام .
مرام : سوري , عبد الله .
عبد الله : ((دار وجهه عليها )) عيون عبد الله .
مرام : حط لنا أغاني حلوة .
عبد الله : الحلو ما يجي الا من طلب الحلو .
رامي و لؤي وعصام : خلاص عاد ما صار طلب , زودتها يا عبد الله أحترمنا عاد .
((أفنان تقعد تضرب مرام وتقول لها في إذنها : من قده يغازل قدامنا وتقول لي هو يكرهني فين يكرهك يا بكاشة))
عبد الله : أوف منكم , آمري مرام .
مرام : لو عندك تامر حسني بليز تحطوه ((تتكلم بصوت ناعم , حتى مخلي شكلها حلو وناعمة ورقيقة ))
عبد الله : في تامر 2005 وفي تامر 2006 وفي تامر 2007
مرام : لا الله يسعد ك حط الألبوم الي فيله أغنية ما يحرمنيش منك .
عبد الله : الله لا يحرمنا من بعض .
رامي : يا كلب زودتها بطل هبالة مو قدامي لأني شكلي راح أفتح الباب وتقعد في النار هذه .
عبد الله : أوف تجيبوا البلى لحظة مرام .
((أول ما حط الأغنية حطت مرام رأسها على الكنبة وقعدت تفكر ؟؟؟؟؟أكيد في عبد الله , حتى العرسان منسجمين كتير مع الأغنية ))

عبد الله بصوته الحلو : حبيبي النهار داه لازم تعرف حبك عملي جنان أنا بحبك بحبك حب ما حبوش انسان , وأه أه يا حبيبي وحياة أغلى حاجة عندك وما يحرمنيش منك وما يبعدنيش عنك .

رامي : أهدي هذه الأغنية لزوجتي وحبيبتي أفنان .
عبد الله : أهدي هذه الأغنية لمن هو سكن في قلبي .
ندى : أتعرف يا عبدوالله لقد أعجبني تعليقك لذلك سوف أهدي هذه الأغنية لزوجي العزيز عصام .((تتكلم بالفصحى ))
عصام : أنا كمان أهديكي هذه الأغنية .
ريهام : أهدي هذه الأغنية لولد خالي أحمد يا ريته لو موجود عشان يسمعها بس الجيات اكتر .
مرام : أهدي هذه الأغنية لشخص عزيز عليا لكن خليه القلب يستر عنه .
عبد الله : مييييييين هو الشخص العزيز .
مرام : زيما انت ما قلت مين هيا البنت أنا كمان ما أقول مين هو الشاب .
لؤي : أهدي هذه الأغنية لمرام عشان مرام منجد جننتني من يوم ما قالت لي أنا معجبة فيك وما زلت أحبك يا مرام .
مرام : يا قلبي عليك ((وسلمت على خده ))
لؤي : مرام تحسبيني ولد صغير لا يا حبيبتي أنا بلغت وأعرف وأفهم , وكمان أنا أطول من عبد الله وأنحف منه يعني لو سمحتي لا تحسبيني ولد صغير أنا شاب حتى صوتي خشن .
مرام : أأ أو سوري والله ما آدري انك شاب .
أفنان : أهدي هذه الأغنية لحبيبي وحياتي وعمري وقلبي رامي .
رامي : وصلت يا حياتي .
عبد الله : منجدك بلغت يا لؤي .
ريهام : ترى في بنات يا عبد الله وكلام زي هذا تسأله انت وياه في غرفة وحدة مش لازم في أمام الكل , ترى أحرجتهم يا عبد الله .
عبد الله : سامحونا يا بنات عاد لزقة لسان .

في سيارة زوج تهاني ...
تهاني : ولاك يا زنمة قوم عني يا نهى أمسكي طوني ترى ما بطيقه خلقة .
نهى : لو رحنا مع رامي كان أحسن .
تهاني : اسكت يا زنمة ما بتبكي .
زوج تهاني : حياتي خفي عليه شوي .
تهاني : لك أنا غلطانة اني أتزوجتك وجبت منك هاي الزنمة الي بدو شي على تمه , ولاك سكوت .
مشاعل : قرف .
أمل : هم وغم معاهم .
تهاني : شوفي انت وياها إزا كان بدك تروحوا معنا على الطائف اهلا وسهلا ما بدكون الله يخلي مية سيارة حوليكن .

صراخ وبكاء طوني وتنفير من تهاني اللبنانية الله عليهم بس .....السيارات الباقية ما لنا شغل فيهم احنا همنا في سيارة رامي لوحدها ...

عبد الله : ترى أنا جيعان وقرمشت الليز بتجوعني زيادة ولو سمحتوا أعطوني ليز أو دوريتوز أو برينجلز المهم شي فيله قرمشة .
لؤي : خذ .
مرام : لحظة ننوع له هات الكيس الي معاك .
لؤي : ليش تتعبي نفسك هو كيس وبس .
مرام : أحسن ننوع له .
أفنان : هو ورامي مو بس عبد الله .
مرام : كويس ندى وعصام نايمين لكن لو سمعوكي وربي أقول كلام ينزل مين قيمتك .
أفنان : انتِ حرة .
مرام : اتفضل عبد الله .
عبد الله : تسلمي ما قصرت .
لؤي : مرام ايش تعملي ؟
مرام : زي أي بنت أحط ميك آب .
لؤي : ما شاء الله انتِ حلوة من غير ميك آب .
مرام : برضوه ما أحب يكون وجهي مافي له ميك آب .
لؤي : في بنت أعرفها في المول جايبة ليا الجنان , كل ما تشوفني بليز اسمك طيب رقمك طيب عمرك , أقول لها والله عمر 14 سنة تقول لي بتمزح عارفة طيب رقمك ..إنا لله قلت لها أبعدي عني تقول لي رقمك أو اسمك أو عمرك على الأقل يا ربي عليها أضن اسمها سوسن صح يا عبد الله .
رامي : نايم سيبوه .
أفنان : دوبنا أعطينا الشبس ما مداه ينام .
رامي : أمس كان سهران طول الليل مسكين مرة تعبان .

((مرام كانت تطالع عبد الله ونظراتها نظرات حزن وشفقة عليه هذا المسكين ))
مرت الساعتين بسرعة و وصلوا على الطائف ...
راحوا على فندق فخم اسمه جراند باهادر وأخذوا ثلاثة أجنحة فخمة وغرفها كتير ..
أول جناح ..كان خاص للرجال والشباب
ثاني جناح ..خاص لكل البنات و لازم معاهم محرم ..ومين غير المحرم لؤي المسكين .
ثالث جناح ..خاص للحريم يعني الستات الكبار ومن حظ ندى انها في جناح البنات .


في الجناح حق البنات ..
مرام قاعدة ترتب أشياءها في دولابها الخاص ..وبعدين راحت على الحمام سوت شاور على السريع وخرجت من الحمام أكرمكم الله , وقعدت على الشباك تتفرج على الجبال والخضرة .
ريهام : مرام ما نومتي ؟
مرام : مافيا نوم .
ريهام : طيب ايش رأيك ننزل نتغدى في المطعم الي تحت .
مرام : لا مالي خلق .

ريهام : خير مرام في شيء .
مرام : لا مافي بس وحشوني أهلي .
ريهام : لسع ما كملنا يوم وحشوكي .
مرام : أنا تعبانة أنزولي مع لؤي الله يخليكي ما فيا أنزل ولا أتكلم .
((ويرن جوال ريهام ))
ريهام : الو نعم عبد الله .
عبد الله : مرام نايمة ولا صاحية .
ريهام : صاحية ليش ايش تبغى منها .
عبد الله : أديني هيا .
ريهام : مرام عبد الله يبغاكي .
مرام : يبغاني ؟؟؟؟؟؟
ريهام : ايوا يبغاكي .
((راحت مرام لأخر الركن واتكلمت بصوت مرة واطي ))
مرام : الو .
عبد الله : كيفك مرام .
مرام : طيبة كيفك انت ؟
عبد الله : حمد الله , مرام الله يوفقك ما تقدري توقفي شوية على الباب .
مرام : ليش ؟
عبد الله : أبى أديكي شيء , بس بسرعة ما راح أطول أفتحي لي الباب جاي لك .
مرام : طيب أستناك .
ريهام : ايش يبغى منكِ ؟
مرام : مالك شغل .
ريهام : طيب يا مرام .
((ويدق الباب بشويش وتروح تفتح مرام الباب ))
عبد الله : في احد صاحي ؟
مرام : بس أنا و ريهام .
عبد الله : أمشيكم .
مرام : لا فيا نوم .
عبد الله : نوم العوافي المهم خذيه هذه , واحنا كنا بالطريق كتبت لكِ هيا.
مرام : ليش عذبت حالك .
عبد الله : مافي تعب , خبيها قبل ما تشوفها ريهام .
مرام : ((ابتسمت له ابتسامة ))
عبد الله : أه يا مرام بتعذبيني .

((وخرج عبد الله وراحت مرام على غرفتها وجلست على السرير وقعدت تقرأ الورقة))

هل تلاقين الذي يشجي ليالي ارتياباً
و احتراقاً مثل صبري ذاب في السهد عذاباً
كلما أمعنت يا ليلاي صداً واحتجاباً
حثني قلبي , فزدت الخطو شوقاً واقتراباً

‏ليس هذا الحب ما ألقاه , بل محض جنون
بعثر الآهات حرى بين شوقي والظنون
آم مما فعلت العمر هاتيك العيون
واعدات بالأماني صائدات كالمنون.

كل نبض في حنايا النفس يدعو حبها
وكأن الله لم يخلق نساءً غيرها
وكأن القلب لم يخفق غراماً قبلها
وكأن الحب قد حل على الأرض لها

هل أنا نهب خيال في خيال؟
جرني وهمي لشطآن المحال
فبنيت الحلم طوداً من رمال
فذرته الريح في أفق ضلالي
حائراً ليلاي في أمر الليالي

لم تعد يا ليل تبدي بسمتك
هل ترى خاصمت ليلي أنجمك
أم تراها هاجرت خلف الفلك
لم تعد يا ليل في الآفاق لك
قدر وحدني دوماً معك
ربما تحرقني كي أشعلك

إيه يا آهات هذا الليل , تليني وتقري
لم يعد في الليل نجم يؤنس العشاق يسري
رحل البدر الذي قد كان للسمار يغري
فإذا الأشواق ثارت في دمي تجتث صبري
كالمنايا ....أسرج المصباح من لفحات جمري
وأنادي : ليس في الأقداح ما يكفي لعمري

ليس في الأقداح ما يكفي شرابي
دابت الأنفاس سكرى في الحباب
فإذا الحلم شراع في العباب
وإذا الحب سراب في سراب ....

من عبودي لميمو

بعد ما مرام قرأت الرسالة مرات ومرات , راحت نامت هيا و ريهام

بعد صلاة العشاء الكل كان صاحي ما عاد مرام , نوع نومها من الثقيل ..
روضة : مرام يا مرام قومي راح نخرج ومحد راح يقعد معاكي هيا قومي .
مرام : بليز طنت سيبوني أنام والله مو طايقة نفسي , ولدك ما خلاني أنام .
روضة : ولدي مين أوه شكلكِ نايمة ولؤي أزعجك , يا أفنان ريهام يا بنات جيبوا سطل موية باردة عشان نكبوه على مرام .
مرام : ((تعمل نفسها تبكي )) طيب ..طيب أوف لا في البيت أعرف أنام ولا اليوم كمان .
روضة : يلا بلا دلع بنات , كل البنات الي في الجناح تحت في اللوبي ما عاد انتِ لوحدك مع أفنان و ريهام وندى .
مرام : طيب فين رايحين ؟
روضة : نتمشى نشوف الطائف ونطلع الهدى والشفا ونروح الأسواق .
مرام : الله يخليكي اليوم نروح الأسواق ونتعشى في المطعم , صراحة ما فيا أطلع الهدى ولا الشفا .
روضة : براحتك نخلي يوم تاني أحسن , يلا قومي .

((راحت مرام على الحمام سوت شاور مرة تانية " تموت في النظافة " وبعدين جللت شعرها وحطت ميك آب خفيف وحلو ولبست عباية مطرزة بالأزرق , والله يكرمكم جزمة باليه زرقاء وشنطة و نزلت معاهم ))

ندى : بالله عليكي بتروحي بهذا المنظر .
مرام : كيف يعني ؟
ندى : منتي شايفتنا خالعين الطرح وفاتحين العبايات .
مرام : بس , عشان كده ليه لاء أفسخ الطرحة وأفتح العباية كلها .
ندى : برافوا عليكي , بس شعرك جيبي من هنا , ايوا صرتي بيرفكت برايت .
مرام : والله .
روضة : كل واحد على السيارة يلا .
ريهام : مرام تعالي نركب مع أحمد وعبد الله .
مرام : يلا جاية .
((وهيا راكبة السيارة طالعها عبد الله من فوق لتحت ))
مرام : يا الله أمل أبعدي شوية فين حاشرة نفسك .
أمل : عاش من شاف شوف مين يتكلم والله .
مرام : أبعدي وحطي يدك في حنكك .
ريهام : خير ليش صاحية منكدة ؟
مرام : أنا مو متعودة أول ما أصحى أخرج .
ريهام : أقول ما انتِ مع بابا ولا ماما عشان تقولي ما ني متعودة .
عبد الله : خير ليش محاربين البنت , يعني أحمدي ربك وافقت تجي .
مرام : الله يسلمك يا عبد الله طول عمرك ولد ذوق .

عبد الله :وانتِ كمان ذوق معايا من أول ما عرفتكِ .
أمل : بس ما صارت دفاع عن النفس .
ريهام : بل بل بل بل خير ليش معصبة ما قالوا شيء .
أمل : يوووووه زودوها أنا ما أحب أحد يعمل هذه الحركات قدامي .
((أمل كانت من هيا في المتوسطة كانت حاطة عينها على عبد الله بس ما أحد كان يدري , حتى ريهام اكتشفت يوم ما غارت من مرام ))
وطول الطريق كانوا حاطين راشد الماجد ورقص و وناسة مخلينها ومعلينها للآخر ..

وصلوا السوق ...كان شبيه بشارع التحلية لكن الي في جدة أحلى من الطائف .

مرام: يلا على الوناسة .
البنات : ووووووووووووووووو .
ريهام : على قول راشد خلوها وعلوها .
البنات : ووووووووووووووووووووووو.
روضة : بس فضحتونا شوفوا كيف الشباب يطالعوكم .
ندى : تعالوا ندخل نشوف كيف حريم الطائف يطالعونا .
مشاعل : هما عندهم البنات الصيع لمن تبين عيونها كيف احنا كل شيء .
مرام : ايش هذا تعقيد صراحة .

((ودخلوا البنات ....وأول ما دخلوا الشباب يطالعوهم ومتجنين على جمالهم , لمن دخلوا كانوا كأنهم نجمات هوليود يمروا من جمب المعجبين والحريم يحشوا وينموا فيهم ))

روضة : والله يا تهاني أول مرة أشوف ناس مفجوعين .
تهاني : من شان بناتنا يامو واخواتي فيهم جمال رباني يامو .
روضة : معاكي حق .
أماني : ريهام مرام أفنان مشاعل تعالوا نروح على مانجو .
ريهام : يلا كمان أشوف ايش طلعوا فساتين جديدة .
مرام : طيب انتوا روحوا هناك وأنا رايحة زارا .
ريهام : خذي معاكي أحد لا تروحي لوحدك .
مرام : مين مافي ولد .
ريهام : يا عبد الله .
عبد الله : آمري خير .
ريهام : روح مع مرام على زارا .
مرام : أنا ما قلت لكِ عبد الله .
ريهام: روحوا .
عبد الله : ((ابتسامة عريضة ))

((وراحوا على زارا ومرام ماهي عارفة تتفرج على الملابس عشان السيد عبد الله وراها في كل مكان ))
عبد الله : ما عجبك شيء ؟
مرام: ما آدري أدور .
عبد الله : طيب شوفي هذا الفستان راح يطلع عليكي مرة روعة .
مرام : مرة حلو , تعرف تختار .
عبد الله : ولو حرمتي .
مرام : زودتها , ((وتكلم الموظف )) بليز أعطيني مقاس ميديم .
الموظف : عاوزة اللون الأبيض والأسود ولا البني والبيج .
عبد الله : الي معاكي حلو .
مرام : أوكي هات اللون الأبيض والأسود .
الموظف : طيب لحظة أطلع لك المقاس .
عبد الله : مرام شوفي كم سعره ؟
مرام : 150 ريال طيب مرة طيب .
عبد الله : طيب الفستان بسيط وقصير ليش سعره كده .
مرام : البنطلون الي تشتريه من ديزل كم سعره ؟

عبد الله : يعني أيام التخفيضات على 130 أو 140 ريال لكن في الأيام العادية على 200 أو حسب نوع البنطلون .
مرام : حتى إحنا كمان الشيء البسيط غالي .
عبد الله : بالله شوفي الحيوانة ريهام كيف تطالع من الزجاج حق المحل .
مرام : مو هيا خلتك تجي عاد روح لأختك وأتصرف معاها .
عبد الله : أوف منها من بنت , هيا جاب لك الفستان يلا على الكاشير .
مرام : طيب لحظة أنا أبى أدفع .
عبد الله : مافي أنا أدفع .
مرام : لا تذكرني بفارس ترى الي فيا كافيني والله أنا أدفع .
عبد الله : طيب لا تزعلي بس .
((وتدخل ريهام ))
ريهام : وقاعدين تضحكوا وتتكلموا وأخذين راحتكم خير .
عبد الله : شر في وجهك انت شر ايش تبغي .
مرام : حتى في السوق تتضاربوا .
عبد الله : أشتريتي هيا على برى .
ريهام : ايش عملتي في دمه .
مرام : ما عملت شيء بس جيتي خربتي الدنيا .
ريهام : طيب في ستار بكس هنا .
عبد الله : عمية ما نتي شايفة أمك وأبوك قاعدين فيه .
ريهام : ليش معصب .
عبد الله : عشانكِ جيتي .
مرام : لحظة أبى أروح نعومي .
ريهام : ليش ؟
مرام: عجبني هذا القميص .
عبد الله : هههههههههههههههه .
مرام : خير تضحك ؟
عبد الله : مو في سنك القميص
مرام : أنا عاجبني .
ريهام : بالله عليكي تلبسي هذا في البيت ما تستحي من أخوانك .
مرام : لا عادي بس عزوز يعلق كتير .
عبد الله : معاه حق هذا القميص ما يتلبس الا في بيت زوجك وبس .
ريهام : ووووووووو .
مرام : ((منحرجة من كلامه ))
عبد الله : مو قصدي بس تبغيه نروح نشتريه .
مرام : لا ما أبغى معاك حق .
ريهام : ايوا اسمعي كلام زوجك فاهمة .
مرام : ريهام .
ريهام : مرام .
مرام : عبد الله .
عبد الله : يا عيون عبد الله .
مرام : شوف أختك .
عبد الله : حلو اسمي على لسانك الحلو , ريهام سيبها زودتيها .
مرام : حتى انت زودتها أسكت .
ريهام : من حفر حفرة لأخيه وقع فيها هههههههههههههههه .
عبد الله : يلا نروح على فين ؟
ريهام : ليش ما نروح نتعشى في مطعم صيني والله فلة .
عبد الله : كلموا العجوز والعجوزة .
مرام : احد يقول لأمه وأبوه كده .
عبد الله : آسف مو قصدي أقول لهم كده لزقت لسان بس .
مرام : أغلى شيء عندنا في الدنيا هما .
عبد الله : يعني مو أنا .
مرام : أنا غلطانة أني قلت لك يا ريهام طيب جاية الطائف لازم توتروني .
ريهام : فين رايحة ؟
مرام : غصبن عن أنفك راح أشتري القميص .
عبد الله : هو في أحد قال لها لا تشتري القميص .
ريها م: لا .
عبد الله : الله يشفي مرضانا ومرضى المسلمين

((وراحت مرام على نعومي أشترت القميص الحلو , وراحوا على المطعم الصيني أتعشوا وخلصوا وراحوا على الفندق ))
ندى : يا بنات تعالوا نجلس في الأرض .
أفنان : ليش ؟
ندى : نلعب حكم .
مرام : أنا أكره هذه اللعبة .
ندى : يا هو ايش القميص الخالع هذا .
ريهام : ههههههههههههههههههههههههه هههه .
أمل : مو حلو عليكي .
مرام : ما أحد طلب رأيك .((والأتنين شمقوا على بعض ))
مشاعل : مرة يجنن بس هذا تلبسيه في بيت زوجك مو معانا .
ريهام : قلت لكِ ما ينفع لك , حتى عبد الله قال لها بس ما تسمع .
أفنان : هو حلو عليها بس ما ينفع الا لمناسبة وحدة .
ندى : يا فيلسوف أفنان ايش هيا ؟
أفنان : بطلوا إستهبال ؟
مشاعل : مافي قولي يا عروسة .
ريهام : أفنان باقي شهر وتتزوجي وتعرفي طعم المناسبة .
أفنان : قليلين أدب .
مرام : هيا أنا راح أجلس يلا نلعب .
ندى : من دحين أقول لكم اللعبة منجد , وكل حكم يتنفذ الا الي خيال وما أظنكم راح تلعبوا في الخيال .
لؤي : وأنا ؟
أماني : روح عند الشباب لمن نخلص نجي نزهمك .

((بدأو اللعبة ))
ندى : أفنان تحكم على مشاعل .
أفنان : قومي أستحمي .
مشاعل : دوبني أستحميت .
ندى : تنفذي ولا مطرودة .
مشاعل : أوريكي يا أفنان .
ندى : ريهام تحكم على مرام .
مرام : حني عليا .
ريهام : أبشري .
ندى : يلا ايش حكمك يا ريهام .
ريهام : تروحي تدقي الباب على الشباب وترجعي .
مرام : أخاف .
ريهام : روحي .
مرام : طيب قوموا معايا مو لوحدي .
البنات : يلا .
((جناح الأولاد كان قدام جناح البنات بالتمام وجناح الحريم كان بعيد شوية ))
مرام : هيا تعالوا ..
((ودقت مرام الباب بسرعة وجات تبى تدخل سكوا البنات الباب عليها , وقعدت تخبط ومو راضين يفتحولها , وقعدت تطالع يمين وشمال ما في أحد بس الورطة الي هيا لا بسها , كانت لا بسة قميص نوم مرة شفاف وعريان ولونه وردي وأبيض وشعرها كانت فاردا ولابسة أساور عشان السهرة و ميك آب خفيف ,
ومن حظها الي فتح لها عبد الله ))
عبد الله : مرام ايش تعملي هنا .
مرام : البنات حبسوني .
عبد الله : ((مو عارف يكلمها عشان القميص حقها ))
راضي : مين يا عبد الله .
عبد الله : واحد غلطان , قولي لي ايش أعمل دحين الكل صاحي .
مرام : كنا نلعب ....
رامي : مرام , ايش جابك هنا .((معصب
مرام : وربي البنات حبسوني برى .
رامي : لحظة ثواني وجاي .
عبد الله : هذا القميص الي أشتريتيه اليوم .
مرام : ايوا ((خجلانة من نفسها مووت ))
رامي : خذي أستري نفسك ودحين أتصل عليهم يفتحوا ليك الباب .((جاب لها غطاء السرير ))
عبد الله : مرام هذا شرشفي مو تنجسيه .
مرام : احترم حالك .
رامي : الو أفنان ليش جايبين مرام عندنا .
أفنان : هيا دخلت عندكم .
رامي : وفتحنا كبرياهات كمان .
أفنان : كنا نلعب حكم وقولنا لها تدق الباب عليكم وتجي , بس إحنا كملناها وحبسناها برى .
رامي : إذا تبغوها تجي , تجي مستورة .
أفنان : ههههههههههههههههههههههههه هههه طيب دحين نفتح لها الباب .
رامي : هيا روحي ولا تجي بهذا المنظر تاني .
مرام : آسفة ((وراحت وعلامات الحزن عليها ))
عبد الله : مرام عجبتكِ .((قصدوه على الرسالة ))
مرام : ((ابتسمت ))

((وأول ما دخلت على جناح البنات قعدوا يتريقوا عليها وهيا تصرخ ومعصبة وضحكوا لمن لقوها حاطة شرشف السرير على رأسها كأنها لابسة عباية فوق الرأس ))


الساعة 30: 4
دق جوال ريهام وكان المتصل حبيبها أحمد وقال لها توقف عند الباب عشان يبغى يكلمها وزهمت مرام .
ريهام : أهلين أدخل .
احمد : بس سطرين .
ريهام : نعم .
((مرام قاعدة تراقبهم من المطبخ ))
احمد : راح أغني لكِ الليل يا ليلاه .
ريهام : تسلم .
((وغنى لها , وكان صوتوا مرة يجنن كان صوت الطرب منجد , و مرام أتذكرت فارس لمن كان يغني لها ويكتب لها أشعار وخواطر عنها , فالمسكينة طاحت على الأرض وقعدت تبكي ))


ريهام : يلا باي .
احمد : باي .
ريهام : مرام , هه مرام ايش فيكي ؟
مرام : جيبوا لي فارس مو ذنبي .
ريهام : مرام لا تعصبي قومي مرام .
مرام : ...............
ريهام : أصحي فارس مات ما تفهمي .
مرام : بس أحبه .
ريهام : حبيه بدعواتك مش ببكائك .
مرام : ما آقدر وربي يشبه عبد الله لمن أشوفوا عبد الله أشوف فارس نفس ضحكته وابتسامته ونحفوه وطولوا ويأخذ من ملامحه وكل شيء في له زي فارس .
ريهام : تعالي لا تبكي , نامي أحسن اليوم تعبنا
مرام : ايوا أحسن لي

وراحت هيا وريهام على غرفتهم ونامت ريهام , لكن مرام ما قدرت تنام مع التفكير بفارس فحطت الوكمان حقها وقاعدة تسمع لأغنية Whitney Huston –TrY It on MY one
" يا قراء أسمعوها مرة روعة تجنن ومرة رومانسية " وقعدت تبكي عشان هذه الأغنية كان فارس يموت فيها بالمرة وكان دايماً يغني لها هذه الأغنية والمسكينة ما نامت الا الساعة 7:30الصبح ...