الجزء 3

الفصل الثالث

ولي لحجاجك يا ام الجبين عرفات
حبك كما الصلوات والقبلة مش يمي
يا معلماني الهوا ومسكنة التباريح
حبك نخيل طارح ميهزهوش الريح
ارمي الحجر جارح تنزل رطب مجاريح
إزاي بتتكسر اشواكي جواكي
ابكي على صدرك ألقى البكا تفاريح

ادهم : يالا يا قلبي وصلنا ، اتفضلي اقعدي وافطري واشربي اللبن بالعسل النحل والشكولاته اللي هتحبيها

حنين : انت مبتنساش حاجة

......... : انسي ، كيف ديه ، حد ينسي روحه ، شوفي أكده لو عاوزه حاچه تاني

......... : لا يا حبيبي كويس كده
_______________________

من بعيد كانت تراقبهم الانظار فهمس النادل لزميله : شوف كده الاتنين اللي هناك دول ، رغم ان سنهم كبير يعني شكلهم باين مش لسه متجوين ، إلا أن سبحان الله كأنهم اتنين في شهر العسل

اه فعلا عندك حق وباين عليهم بيحبوا بعض اوي ربنا يديم عليهم محبتهم ويرزقنا باللي يحبونا يا اسامة ، يالا نشوف شغلنا بدل مانترفد النهارده

أسامة : اه يالا مع ان شكلهم حلو اوي والواحد نفسه يقف يتفرج عليهم ويآخدلهم صور كمان

أمجد : صور ايه يا ابني انت اتجننت ، انت متعرفش مين ده ؟؟

أسامة : لا معرفش ، ليه هو انت تعرفه ؟؟؟

بضحكة مرتفعة أمجد قائلا : معلش ما انت مستجد هنا ، ده بقي يا سيدي ادهم بيه عبد الكريم القناوي عين اعيان قنا واللي معاه دي تبقي مراته وبييجوا عندنا هنا كل فترة يقضوا كام يوم ويمشوا ، بكره تشوفهم هنا كتير بس لو التزمت بشغلك لان شكلك مش هتطول معانا لو فضلت متنح عليهم كده

_ : لا لا فال الله ولا فالك يا شيخ ، ربنا ما يجيب حاجه وحشه انا ما صدقت لقيت شغل كويس في مكان محترم ، كل ما هنالك ان شكلهم حلو اوي والحب باين في عينيهم

_ : طيب يالا يالا نشوف شغلنا بدل ما نلاقي المدير فوق رآسنا وتبدأ شغلك بالخصومات وبدل ما نشوف الحب ف عينيهم نشوف الدموع ف عينيك انت يا فالح
___________________________
هشام : يالا يا همسه اصحي كفايه نوم أكده عاوزين ننزلوا نتمشوا شوي علي البحر

......... : طيب سيبني شويه صغيرين وأنا هقوم

........ : طيب يا قلبي ، هنزل آني اچيب حاچه من تحت وراچع طوالي بس انتي فوقي

........ : حاضر هقوم اهوه

تركها هشام ونزل يتجول في الفندق حتي وصل واشتري بعض الحلوي وصعد للغرفة ومازالت همسه مستغرقة في النوم

دلف بهدوء واقترب منها وهمس لها : همسه والله اشتقتلك ، يالا قومي شوفي چبتلك إيه

اعتدلت همسه وردت بتثاءب : انا مش قادره افتح عيني ، عاوزه انام طول الوقت

...... : طيب بس يالا قومي وفوقي وخودي شوفي چبتلك إيه

لمحت همسه الشيكولا داخل الحقيبة البلاستيكية فقفزت في حضن هشام قائله : الله شيكولا ، انا بحبك اوي

احتضنها هشام بقوة وهمس لها : يا بوووووي وآني بحبك قوي قوي ، طيب بقول ايه ، خلينا نقضوا اليوم هنه وبلاش ننزلوا ، آني مشتاقلك قوي ومعاوزش حاچه تشغلك عني حتي لو كان البحر ، هاه إيه رأيك ، تقعدي مع هشام ولا تنزلي للبحر

صدح صوت همسه وملأ الغرفة مقهقهة ثم اردفت : انت بتخيرني بين حاجتين صعب الاختيار ما بينهم بس أنا المرة دي هختار

....... : طيب يالا آني مستني اهه

.......... : اكيد هختار البحر طبعا
ثم عادت و ارتفع صوتها بضحكة شقية

......... : بقي أكده ، طيب ماشي وآدي نومه ، شوفي بقي مين اللي هينزلك تشوفي البحر

اقربت همسه تتلمس وجه هشام قائله : انت لو خيرتني بين أني أعيش الحياة لحظة واحدة معاك وبعدها أفقد حياتي عن أني أعيش باقي حياتي من غيرك وقتها هختار اني اعيش معاك اللحظة دي ومش عاوزه اعيش تاني بعد كده

....... : يا بوووووووي إيه الكلام الحلو ديه ،، بس بلاش سيرة الموت ، بعد الشر عليكي يا قلبي ليه بتقولي اكده ، آني عاوزك تعيشي معاي لما تعچزي وتچبيلي عيال كتير ونچوزهم ونفرحوا بيهم وبولادهم وولاد ولادهم كمان ،، عاوزه تفضلي چوا قلبي لچل أحس أني عايش

......... : طيب خلينا نتفق اتفاق لازم تعرف ان علشان انا اتعلمت الحب علي ايدك وايد بابا فمعنديش استعداد ان اي حد حتي لو كنت انت تخيرني بينك وبين اي حاجه تانيه لان كفتك دايما راجحه والاختيار هيكون دايما انت وبس فبلاش تعملي اختبارات تاني ماشي

......... : والله غلبتيني يا بت قلبي اللي كان هيشيب لو مكنش عاش چوا قلبك دلوك ، اقترب منها يلثم شفتيها الناعمتان واحتضنها بشوق جارف واطفأ ضوء المصباح وسطر العروسين ليلة معا تحت ضوء القمر ليكون الشاهد الاوحد علي ذلك الحب والعشق الذي سكن قلب ذلك العاشق منذ نعومة اظافره و حتي جمع الله قلبيهما ليعيشوا معا ما تبقي من الحياة في سعادة وهناء
________________________
فضة : أصباح الخير ياما
غنية : يصبحك بأنوار النبي يا بتي ، فينه حمزه
........ : لساته نايم متقلقيش عليه ، أما يصحي براحته آني هفطره
......... : آخر النهار هتآچي قسمه وهنروحوا نشترولك لبس الحچ ان شاء الله ، هتآچي ويانا ولا نشترولك احنا؟؟
........ : لاه يا بتي روحوا انتوا آني هقعد هنه مع حمزة وانتي عارفه المقاسات ومتنسيش حاچة ابوكي

........ : لاه انسي كيف ، ده آني هچيب للغاليين ، المهم تروحوا وترچعولنا بألف سلامة ومتنسوناش بالدعوات

.........: ربنا يباركلك في چوزك وولدك ويملا عليكي الدار بالعيال يا بتي

........ : يارب ياما يسمع منِك ربنا قادر كريم
____________________
في المساء تجهزت الحسناء حنين وتأبطت ذراع ادهم وتألقت بجانبه في شموخ تترقبهم الاعين
أسامة : الله الله ايه الجمال ده كله ، أميرة بتتمختر

أمجد : يا بني انت شكلك كده مش عاوز تجيبها لبر الامان ، يا بني خليك ف حالك وانتبه لشغلك هتودي روحك ف ستين داهية ، انت عارف لو سمعك وانت بتتكلم عنه او عن مراته كده ، مش بعيد يضربك بالنار وتبقي بالنسباله كلب وراح ولا ليك عنده ديه

......... : ليه يعني كل ده ، يا بني محدش يقدر يمنع نفسه ان عينه تشوف حاجه جميلة ويقول عليها الله ، ده ربك جميل وبيحب الجمال ازاي العبد يكف نظره عن الجمال وبعدين انا معملتش حاجه انا بس بقول الله ، تعرف انا اصلي طول عمري بخاف من الحب ، كل الناس اللي حواليا حبوا واتجرحوا واللي خان واللي غدر وكلهم كانوا بيحكولي فأنا ذي ما تقول كده كرهت الحب بس بصراحة الاتنين دول وحبهم لبعض خلوني ممكن اغير رأيي في موضوع الحب ده وأني ممكن افتح قلبي وادور علي واحده احبها ، شوف ازاي قاعد وواخدها في حضنه وكأنه عاوز يخبيها عن عيون كل الناس اللي حواليه مع ان الغالبية اجانب ومحدش يعرفهم ولا حد مهتم لحد ،، الناس كلها بترقص وبتشرب ومش شايفين ولا سامعين غير الموسيقي بس بردو هو عاوز يخبيها جواه ، سبحان الله الحب ده اصله رزق من رب العالمين لما ربنا سبحانه وتعالي بيبقي راضي عن عبده بيرزقه بيه فربنا يرضي عننا ويرزقنا الحب الحلال او الحب اللي ذي ده كده يبقي نعمة وفضل

........ : طيب يا سيدي نشوف الناس بدل ما المدير يشوفنا ونآخد جزا وربنا يرزقك بالحب الحلال

......... : طيب بالله عليك انا هروح أخدم عليهم وأشوف طلباتهم

.......... : روح بس خلي بالك جوزها صعيدي ولو رفعت عينك في مراته هيخرمهملك انا نبهتك واجري واجرك علي الله

........ : ماشي يا عم خلاص عرفنا
توجه اسامة لأدهم مطأطأ رأسه ونظره لأسفل ،، اقترب متسائلا : اتفضل يا فندم تحت امر حضرتك ، تطلبوا ايه ؟؟
....... : هاه يا قلبي تطلبي إيه ؟؟
وبصوتها الهادئ ردت حنين : انا جعانه هآخد بيتزا بالسي فود ومعاها بيبسي
......... : تمام يبقي تطلب لنا بيتزا حچم كبير بالسي فود وبلغ الشيف أحمد أنها لأدهم القناوي وهو هيقوم باللازم ومتنساش البيبسي انت بس قوله وهو عارف هيعمل ايه

........ : حاضر يا فندم تحت امر حضرتك