الجزء 14

لفصل الرابع عشر

حنين : هما اتأخروا اوي كده ليه ؟؟

عبد الكريم : تعالي يا بتي اقعدي وقولي يارب

حنين باكية : مش عاوزه اقعد يا عمي ،، أنا عاوزه ادهم ،، عاوزه اطمن عليه

عبد الكريم : ربنا يطمنا يا بت اخوي

وصل عبد المجيد للمشفي واقترب من عبد الكريم قائلا : سلامة ادهم يا خوي آني لسه عارف الخبر من چميلة

اومأ عبد الكريم برأسه والتزم الصمت ،، لحظات وجاء الانفراجه وفُتح باب الغرفة وخرج الطبيب يطمأنهم علي حالة أدهم ،، استداروا جميعهم حوله يظهر علي الوجوه القلق والتوتر والخوف والكل يردد يارب سترك ،، لاحظ الطبيب الخوف علي وجوههم فبادر بالكلام : الحمد لله المريض بخير وخرچنا الرصاصه وان شاء الله ربنا يعدي الاربعة وعشرين ساعة اللي چايين دول علي خير وهيبقي كويس مع الالتزام بالعلاچ

حنين : امتي اقدر اشوفه يا دكتور من فضلك ؟؟

الطبيب : هو دلوقت دخل العناية وان شاء الله حالته تتحسن وهسمح لكم تشوفوه ،، بعد اذنكم

عبد الكريم : الله يطمن قلبك يا ولدي

حنين تهمس باكية اللهم لك الحمد والشكر كما ينبغي لجلال وجهك وعظيم سلطانك ،، اللهم احفظهم لي واتم شفاءهم و ردهم لي سالمين يارب العالمين
______________________
الممرضة : هو حضرتك چوز المدام همسه ؟؟

هشام انتفض من مقعده ولحق به بدر : أيوه ،، آني ،، خير ،، همسه فيها شي ؟؟

الممرضة : لا اهدي اهدي ،، هيا فاقت وبتسأل عنك ،، وهي دلوقت طلعت غرفة 65 في الدور اللي فوق

هشام بفرحة : الله يكرمك يارب ،، يالا يا چوز خالتي نشوفوها

بدر : طيب روح يا ولدي اطمن علي مرتك وخليك چارها ،، هروح اطمن علي ادهم وارچعلك تاني

تركه بدر ليطمئن علي رفيق دربه أما هشام فتوجه لسلم الصعود ولم يقو علي انتظار المصعد الالكتروني ،، توقف امامه للحظات وحين تأخر تحدث لنفسه قائلاً : رچليه اسرع آني لسه هستناك توقف قدامي
سريعا وصل للدور العلوي وبحث عن رقم الغرفة ،، دلف ليجد همسه مستلقاه علي الفراش لا تقوي علي الحديث ولا تنطق إلا بإسمه واسم ادهم

اقترب منها هشام وامسك يدها وقبلها قائلاً : آني هنه يا قلبي چارك ،، متخافيش من شي

فتحت عيناها بإجهاد وتساقطت دمعاتها وسألت : فين بابا ،، أنا عاوزه اشوفه واطمن عليه ،، هو ليه مجاش علشان يشوفني ،، هو حصله حاجه ،، قولي يا هشام متخبيش عليا

هشام : همسه حبيبتي ،، خالي بخير متقلقيش بس انتي اهدي شوي وشدي حيلك وآني هآخدك تشوفيه

همسه : يعني هو فعلا حصله حاجه ،، هو فين وديني ليه دلوقت

هشام : همسه يا قلبي ،، خالي تحت والله معاكي هنه ،، وهوديكي تشوفيه بس انتي تعبانه دلوك والداكتور قال ممنوع تتحركي وبعدين انتي عاوزه تخوفيه عليكي ،، انتي مشيفاش الدم والمحاليل اللي في يدك ،، انتي بس شدي حيلك وهنروحوا نشوفوه ونطمن عليه وبعدين يا ادهم القناوي مش حتة خدش صغير هيرقده

همسه تبكي بشدة : طيب انا هنا ليه وايه اللي حصلي انا مش فاكره حاجه بس عندي ألم شديد اوي

نكس هشام رأسه حزنا : بعد ما عرفتي ان خالي اتصاب ،، وقعتي وغيبتي عن الوعي وحصلك نزيف شديد وراح الچنين

همسه ببكاء شديد وقد اغرق الدمع وجنتيها واحمر انفها : يعني ابني راح ،، انا دلوقت مش حامل ؟؟

هشام : همسه يا قلبي ،، انتي اكده بتأذي نفسك ،، الداكتور قال هتبقي كويسه وهتخلفي تاني وتالت وعاشر وهتملي علينا البيت بالعيال بس المهم تسمعي الكلام

دلفت حنين ومعها فضة وقسمة لتطمئن علي همسه ، اسرعت واقتربت منها تضمها بيت ذراعيها : بنتي حبيبتي متعيطيش بابا بخير ان شاء الله يقوم بالسلامة
______________________
الضابط : السلام عليكم يا حاچ عبد الكريم
عبد الكريم : عليكم السلام ورحمة الله وبركاته ،، اهلا يا ولدي
...... : ألف سلامة علي ادهم بيه ،، انا كنت عند الدكتور دلوقت ،، كان لازم نطمن عليه ونآخد اقواله

..... : اقوال مين بس يا ولدي ،، انت عارف ان طول عمرنا في البلد ملناش خصومه مع حد وبنتعامل مع الكل بما يرضي الله

..... : يا حاچ عبد الكريم الظاهر انك متعرفش ان في قتيل في الموضوع

جحظت عينا عامر واقترب يسأل : قتيل مين ديه يا باشا ،، وبعدين اخوي ماله بالقتل ،، ديه هو اللي اتصاب

...... : القتيل يبقي ولده لزين الدين ولقينه چتته علي الطريق اللي كنتوا ماشيين عليه بس الناس كلاتها اتنبهت لأدهم بيه ومخدوش بالهم من اللي مات واما طلع النهار چت لنا اخبارية بوچوده مقتول في الارض اللي علي الطريق ،، الظاهر ان الموضوع قديم قوي ؟؟

...... : حتي لو الموضوع قديم احنا ملناش صالح بيه

...... : انت كنت معاه في العربية يا عامر بيه ؟؟

...... : ايوه كنت معاه بس مشوفناش حد

...... : يا ولدي العيار اللي صابنا عيار طايش واحنا مهنتهموش حد

..... : لازم اسمع الكلام ديه من ادهم بيه بنفسه ،، ان شاء الله اما نطمن عليه ونقدر نآخد اقواله هآچي اقابله
______________________
عبدالمجيد : زين الدين ديه ولده لمرسي ؟؟

عبد الكريم : ايوه وسد الكلام ف الموضوع ديه دلوك ،، خلونا نطمنوا علي ادهم لاول وبعدين ندوروا مين ورا اللي حوصل

عبد المجيد : هيا ليها تاني يا خوي ،، اللي حوصل ديه ملهوش غير معني واحد ،، ان الموضوع القديم اتفتح من تاني والله يچيرنا من المستخبي

عبد الكريم بحنق : قولتلك سد الكلام في الموضوع ديه دلوك يا عبمچيد
_______________________
حنين : حمزة تليفونك معاك ،، انا سيبت كل حاجه في البيت حتي التليفون

حمزة : ايوه يا ماما معايا

حنين : طيب اتصل بجدو عبد الرحمن او تيته لازم اعرفهم اللي حصل

اتصل حمزة بعبد الرحمن وبصوت مختنق : ألو ازيك يا جدو

عبد الرحمن بفرحة : اهلا يا قلب چدك ،، اتوحشتك قوي يا حمزة

حمزة : وحضرتك كمان يا جدو وحشتني اوي وتيته كمان

عبد الرحمن بتوجس : مالك يا ولدي ،، صوتك اكده كنك بكيان ،، في ايه وفين امك ؟؟

تناولت حنين من يده الهاتف وهي تبكي : ايوه يا بابا ،، ادهم اتصاب بطلقة في صدره واحنا معاه في المستشفي ،، خرج من ربع ساعة من العمليات وهو دلوقت في العنايه المركزه ادعيلوا يا بابا ،، وكمان همسه بسبب اللي حصل وقعت من طولها بعد اما سمعت وحصلها نزيف والجنين سقط ،، بايا لازم تيجوا انا محتجالكم جنبي

عبد الرحمن : سترك يارب ،، هنآچوا يا بتي بالليل هنكون عِندك بإذن الله
انهي معها الاتصال واسرع يبلغ مني بما حدث وطلب منها تجهيز الحقائب للتحرك فورا للسفر لقنا

مني بفزع : يا حبيبي يابني ،، يارب نجيه يارب وجيب العواقب سليمة ،، يا تري يا بنتي عاملة ايه دلوقت انتي والولاد ،، يارب سترك يارب ملناش غيرك

عبد الرحمن : حنين كويسة يا مني بتحاول تتماسك لچل حمزة ما يوقع هو كمان

مني : هو كمان !!
يعني ايه هو كمان يا عبد الرحمن انت مخبي عليا ايه تاني ،، همسه مالها ،، قولها انا قلبي حاسس فيها حاجه ،، البت متعلقة بأبوها ،، اكيد حصلها حاجه

عبد الرحمن : همسه وقعت من طولها بعد ما سمعت الخبر ونقلوها هيا كمان المستشفي وحصل لها نزيف والچنين سقط ،، ربنا يعوض عليهم

بكت مني : قلبي عليكي يا بنتي طول عمرك حظك قليل من الدنيا

زهيرة : طيب يا واد عمي تفتكر مين اللي هيكره ادهم وهيتربصله اكده علي الطريق

عبد الكريم : آني مخبرش مين بس المواضيع القديمة كتير ومحدش عارف ايه اللي مستخبي بعد اكده

زهيرة : الله يسترها يا واد عمي والله منقصينش هم
________________________
عامر : ألو ايوه يا بدر ،، بقولك ايه آني هچيب منصور وهنآچوا للمكتب ،، متخليش حد قاعد مشي الكل ،، في كلمتين لازمن نقولهم مع بعضينا

بدر : ماشي يا واد عمي مستنظركم
عبد الرحمن : سلامة ادهم يا خوي ان شاء الله ربنا يتم شفاها علي خير ويطمنا چميعا

عبد الكريم : الله يسلمك يا خوي ،، ربنا يسترها ويچيب العواقب سليمه

مني اقتربت تحتضن حنين : بعد الشر عنهم يا حبيبتي ربنا يطمن قلبك وقلبنا عليهم يارب ،، ان شاء الله خير وربنا هيسترها

تبكي حنين : خايفة عليهم اوي يا ماما ،، وكأني كنت حاسة وقولت لأدهم بلاش تآخد معاك حمزه

مني : الحمد لله يا بنتي علي كل حال وقولي يارب ان شاء الله ربنا مش هيتخلي عننا وهيشفيهم ويعافيهم بإذن الله

حنين : يارب يا ماما ياااارب
عبد الرحمن : متقوليش اكده يا مني ،، كله قدر ومكتوب ،، يالا شدي حيلك خلينا نتحركوا قبل الليل