الفصل 29

وقفت ديم عند المرايه وضبّطت فستانها الفيروزي .. وشعرها كان طاول شوي لنهاية الرقبه .. وسيّحته كله بدون لف طلع شكله خطير ..وابتسمت برضا عن نفسها واخذت عبايتها والشنطة ونزلت لأبوها

جيني كالعادة مرابطة في الصالة .. خذت لها نظرة ع شكل ديم اللي ماعجبها ابد : وين فيه روه ؟
ديم وهي تلبس عبايتها : اوه سوري عمتي نسيت أستأذن .. جيني ممكن ممكن اروح لعرس علياء ممكن الله يخلييييج لاتقولين لا
جيني عفست وجهها : في يتطنز ؟
.... : ههههههههه لا من صجي ههههههههه
طلت من الشباك وشافت ابوها وجدها هناك .. عجبهم الجو فطلعوا يشوفون حديقتهم الصغيره المتواضعة ..

ديم : بابا يللا لا نتأخر
ابراهيم ومشغول شكله يزرع شي : ان شاء الله حبيبتي .. ها يبه تجي معنا .؟
حمود : وين ؟
.... : بنوصل البنت ,, أي مكان تبيه ماتبي تغير جو شوي ؟
..... : بلى يللا مشينا
جيني معصبة لانهم مايخذونها معهم دايم .. مالت عليها بس

بس هم طلعوا وخلوها ..

وصلت ديم ونزلت لها فدوى .. ودخلتها للمجلس ...
ديم صفرت : يااااااوييييلي يااااويلي ..
فدوى انحرجت : وجع قولي ماشاء الله
...... : ههههه قلت والله ,, بس اعاندج .. (وفصخت برقعها تطالع فدوى باعجاب من فوق لتحت )
فدوى ضربتها : لاتطالعين كذا كنج من ذليك
ديم تستهبل وترفع حوجبها : انتي ياحلوه ياا أم أصفر .. تخاويني ؟
فدوى ضحكت وهي ترتب شعرها باطراف يديها : هههههههههه يعععع الله يقطع بليسج ..
..... : عاتي امزح
..... : ادري .. يللا افصخي اشوووف فستانج انتي
....جات ديم بتفصخ عبايتها بس تذكرت : فيه احد ببيتكم
فدوى تذكرت : فوازي بس , لحظه بطلعج غرفتي
ديم : لا عاتي نقعد هنا مو مشكله ..
فدوى : أقول بس .. تبيني انزل كل قرابيعي هنا .. لبسي برقعج وامشي .. فواز بغرفته
ديم ماودها .. تستحي تمر من يمه حتى لو بالعبايه بس شتسوي ماتبي تزعل فدوى ..

ربطت البرقع واخذت شنطتها وطلعت ورا فدوى ..

اول ماطلعوا الدرج .. كانت غرفة فواز هي الي في الوجه ,, وكان جالس ع سريره يلعب بلاي ستيشن .. ولما انتبه لوجود احد عند الدرج التفت .. بس ماتحرك من مكانه
فدوى وقفت وابتسمت : فواز ,, هذي ..
مامداها تكمل الا وقف فواز : ديم .. صحححح ؟
ديم انحرجت موت : هلا فواز
فواز وينقل انظاره بين الثنتين .... : وانتي .. لابسه .. مثل فدوى .. حلو ؟
فدوى ضحكت : لا حبيبي بس أنا ألبس حلو كذا ..
فواز ببراءه : ايه .. بس حتى ديم حلوه ..!
ديم واحترقت وقرصت فدوى : وديني الغرفة بعدين سولفي مع اخوج
فدوى بتموت من الضحك ع حالة ديم : طيب ,, فواز احنا بالغرفه طيب ؟
فواز فهم نظراتها : طيب ,, ما أجي .. بجلس هنا ..

ابتسمت له فدوى ومشوا ثنتينهم

اول مادخلوا فدوى ضحكت ضحك وديم فصخت عبايتها وودها تضربها بس سكتت

فدوى : ياحليله فوازي عرفج
..... تتطنز : ياحليله فوازي عرفج
..... : هههههههههههه كح كحححححح
ديم راحت لها ركض : فددددددوى شفيج
فدوى وماتوقف كحه .. راحت ديم لثلاجتها وجابت لها ماي وشربتها : خبله خبله خبله محد قال لج تضحكين
فدوى وترجع راسها لورا : لا خلاص .. الحين اوكي
ديم وتتأمل تعابير فدوى : اسمعيني .. ترا من اول مافتحتي لي الباب ووجهج مو عاجبني بس انا ماتكلمت ,, والحين والله تقولين شفيج
فدوى وهي تمسك رقبتها : مافيني شي ماتدرين انتي يعني ان عندي ضيق تنفس
.... : ادري , بس فيه شي ثاني

(دق جوال فدوى )

فدوى وهي تطالع الرقم وتمد لها الجوال : هذا الشي الثاني اللي فيني , من امس
اخذت ديم الجوال وشافت الرقم الغريب : ردي طيب يمكن احد يبغاج ضروري
.... : ماني راده انا اعرف مين
..... : مين ؟
..... : مشعل
..... : وكيف عرفتي ؟
فدوى وهي تتكلم بضيق : انا ما أعرف انا احس بس ..
ديم تركت الجوال وراحت لفدوى اللي باين تتنفس بصعوبه : ياربيه فدوى ردي عليه شوفي شيبغى يمكن ترتاحين
..... : .....
قامت وفتحت شباك الغرفه شوي يمكن يتهوى الجو شوي على فدوى
فدوى بصعوبه تكلمت : هاتي الجوال ديم .. بكلّمه ..
تقدمت لها ديم وهي تحس ان خطأ تكلمه فدوى .. بس هي ضايقه وااظاهر هو زاد عليها .. لانها اذا كانت متضايقه من شي يأثر عليها زياده ..
فدوى : ..........
مشعل باستسلام : اخيرا رديتي ..
فدوى بصوت تحاول يكون طبيعي : نعم مشعل بغيت شي
مشعل وعلطووول من اول جمله قالتها : فدوى شفيه صوتج انتي تعبانه ؟
...... : مالك شغل .. مو تعبانه
..... خاف مشعل : لاتقولين ماخذتي الدوا ولا الفنتالين ؟
...... : مشعل شتبغى
مشعل وقلبه ذااااااب : مولان أمانه اللي فيج مني صح ؟ انا اذكر اول اذا ضايقتح يصير لج كذا ..
...... : مو منك .. ومافيني شي .. وورانا عرس نبي نروح له .. و (وبتكمل غصب عنها كحت كحة قويه )
مشعل وضعف لأبعد درجة : فدوى قلبي آآآسف وووالله آآسف
فدوى بعد ماشربت شوي ماي : كم مره اقول لك يامشعل .. لاتحط ورا اسمي كلمات .. زي كذا (قصدها قلبي )
.... : غصب عني والله ,, فدوى انتي ليه ماتردين وترحميني ,, وربي بس كنت بعتذر لج انا مادريت بتضيقين من الحركة والله
فدوى بعتب : شلون ما أضيق يامشعل .. تدري لو خالاتي دارين وربي مايفكوني من لسانهم وانت عارف
تنهد مشعل : آآآآآه لاتلوميني .. انا مغترب يافدوى وربي مغترب .. جاي ادوّر وطن انا حسيت له بحنين .. وماصدقت لقيته ...غصب عني وربي غصب عني
فدوى ودموعها قامت تنزل وهي تطالع ديم اللي اشغلت نفسها تضبط مكياجها عشان ماتربكها : طيب .. حصل خير ...
..... : فدوى ..
..... : نعم
.....بحنية : ليه تصيحين .. والله قطعتي قلبي يافدوى
...... : ماصحت خلاص ؟
..... : مولان وربي انا ماني قوي .. لاتبكين تكفين
مسحت دموعها : خلص قلنا لك مابكيت شوف ها هههههههههههه اضحك بعد
ابتسم مشعل : باين .. عموما فدوى خلص انا مابي ازيد عليج بسكر .. بس كنت بقول لج شي ..
..... : قول
.....تنهد : تدرين .. وربي اني ماتعمدت بس كذا بالصدفة شفتج .. اممممم .. كنت متخيل انج مولان اللي شفتها اخر مره قبل 3 سنين .. بس الحين احلوّيتي .. صبغتي شعرج وقصيتيه وجاي لونه مع لون التنوره .. وعاكس بعد لون عيونج اللي نسخه من عيوني انا وفواز اخوج .. و ...
..... : مشعل ..!
..... : عيون مشعل ..
..... : خل عيونك لك .. وبليز لاتكمّل , كل هذا قزيته بلحظه وحده ؟.. وجاي تقول لي بعد عيني عينك , صج قوي عين !
.... : ماعلي .. اولا انا ماتعمدت .. ثانيا ابيج تعرفين انج صبغتي قصيتي طلتي قصرتي سويتي أي شي .. فأنتي مازلتي مولان اللي انا ...
..... قطعته لانها خايفه من الكلمة اللي بيقولها : طيب مشعل انا تأخرت بسكر
ضحك مشعل : ههههههههههه اوك ,, اوك نو بربلم .. بقولها لج (سم داي ) ..وبتسمعينها دايم .. لين تزهقين منها وتقولين مشعل( ستوب ذات) ..
.... : مشعل .. اشوفك ع خير
.... : فدوى .. كلمة اخيره .. ترا انا مارجعت .. الا لنفس السبب اللي خلاني رحت .. يعني لاتظنين اني بعدّي الموضوع .. !! صبري علياء تتزوج .. وتشوفين
...... ماعرفت شتقول وحست انها بدت تضيق زياده : طيب .. مع السلامه
مشعل ماحب يضايقها اكثر : اوك لاتزعلين مني طيب ؟.. الله يحفظج .. مع السلامه

سكرت فدوى ورمت الجوال .. وديم ماتكلمت تبيها هي تقول .. بس فدوى كاتمه بقلبها وصدرها وفجأه ماشافت الا فدوى رمت نفسها ع السرير تصيح بطريقة تخوف وتكسر الخاطر بنفس الوقت