الفصل 43

بعد اسبوعين .. في المركز ..

مشعل جالس على الكرسي مقابل فواز يراقبه و بدون مايحس مالت رقبته وغمضت عينه بشكل مضحك ..
فواز وهو يرجع ظهره للسرير : مشعل ,, روح نام .. بيتكم .. عادي
مشعل ابتسم بنعاس : لا ماعليك شبعان نوم
ابتسم فواز : شبعان وين ؟ ,, وانت طول الوقت .. هنا ..
مشعل يبي يغير الموضوع فقام ومسح وجهه وشعره بيدينه : يللا كمل فواز ماعليك مني .. يللا
فواز لف راسه يمين يسار : تعبت ... مشعل .. تعبت .
مشعل انكسر خاطره وماوده يضغط عليه .. فقرب له وجلس جمبه على السرير وضحك : خلاص ارتاح , الدنيا ماتطير صح ؟
..... : مافهمتك ؟
رمى مشعل ظهره لورا بحركة تحسس بطفش بدا ينمزج بشوي يأس : اقول يعني , الدنيا مارح تطير اكثر من ماهي طايرة , اللي ربي كاتبه بيصير .. ,اسمعهم دايم يقولون يمكن بكره اجمل .. والواقع ياولد عمتي ان اليوم نفسه بكره .. نفسه امس .. مافيه شي اجمل .. كل شي ضدك في هالحياة ..
فواز تربع : مجنون !
.... لف راسه باستغراب : ليه ؟
..... ضربه فواز على ذراعه بخفه وابتسم : تقدر .. انت .. تسوّي .. بكره اجمل ..!
رفع مشعل حاجبه كنه قاعد يفهم كلام فواز .. فيما سرح فواز شوي وهو يتأمل التلفون : مادقت ,, من زمان .. فدوى ..
اشتغل قلب مشعل من اسم فدوى بس رد علطوول وكنه مجهز الكذبة :لا دقت ,, بس انت كنت نايم ..
..... : ماقلت لي .. ليش ؟
مشعل وهو يحوس شعره من الربكة : هي قالت خلاص انا بدق بعدين
ضحك فواز ورفع جسمه من على السرير : ههه كذاب .. زي دايمن
سكت يراقبه وهو ماسك الكتاب وشادّ على نفسه وراص عيونه يركز باهتمام ويربط بين الأشياء
سحب مشعل الكتاب : فواز قلت لك لاتجهد نفسك
رجع فواز يسحب الكتاب : مالك شغل ,,خل المدرب .. يجي ..
مشعل مايدري شيقول : فواز .. خلاص بكره ان شاء الله نكمل ..
فواز ابتسم له بامتنان : لا .. أنا أبي .. أسوي لك .. بكره أجمل ..!
رنّت كلمات فواز بأذنه وفتح مشعل فمه لثواني وبعدها تحولت الفغره لابتسامه واسعه .. على كل اللي فيه , فواز حاس بالامتنان له , وكل واحد يحاول يعبر للثاني .. وحبهم لبعض لايمكن يغيره شي .. كل واحد يبدي الثاني عشانه بس ..

مشعل : فــواز .. أنـــا ..
فواز : اششششش , أبي اركز .. خلّني ,, عشان اجيب لك بكره حلو ,, تتزوج فيه فدوى اختي ..
جمدت ملامح مشعل ثاني مره بس هالمره بشكل اكبر .. , ماكان فيه شي يتحرك بوجهه غير عيونه ترمش لفواز بغير تصديق .. اكيد يدري بس معقوله متذكر ومايبغى يقول ويفتح السالفة ؟ ولا ماكان فيه مناسبه ينفتح فيه الموضوع , فتخزن في ذاكرته لين ذكره شي ؟ ولا شلوووووون ؟

فواز رفع راسه وضحك : يعني كذا ,, شكلي .. اذا استغربت ,, (عفس وجهه )
ضحك مشعل غصب عنه وراح يوقف عند المرايه يشوف شكله : ههههههه حمار
...... :الا اقول فواز .. انت تتذكر من زمان ولا تو الحين ؟ (قصده سالفة الملكة )
فواز مايبي يقوله : خلني اركز ..


في الجامعة ..

الثلاث جالسين .. ومن زمان ماجلسوا بصفاء ..

فدوى راسها بحضن ديم .. غافيه وتنفسها شوي ملخبط.. كانت قبل شوي توصف لهم حالة البيت بدون فواز , وانها تروح تنام بغرفته كل يوم من كثر ماهي فاقدته ..
صبا جالسه قبال ديم ..

ديم طلعت دفترها ماتبي فدوى تسمعها ,, وكتبت لصبا (ياحماره شوفي حالتها ) واشرت على فدوى بحضنها
صبا خذت الدفتر وكتبت ( طيب شنسوي برايج ) ؟
"نكلم لها فواز ونقول له انها تسلم عليه لان اهلها مانعينها تكلم , ونطمنها عليه "
" اممم فكره , والمشكله هم عارفين انه ممنوع تتصل الصباح فترة التدريب وهي ماتقدر تكلم الا هنا "
" يقطع ابو الخط عمى اكتبي زين مافهمت شي "
" اقووول انطمي يللا انتي بتدقين على فواز "
" لا والله شمعنى انا " ؟
" لانج حماره , ولان انا لو دقيت يمكن أأثر عليه ماتفهمين انتي ؟ "
سكتت ديم تستوعب , ماودها بس من نزلت راسها تشوف حالة فدوى .. قررت انها تبدّي خوفها على صديقتها .. وهزت راسها لصبا بموافقة وتصميم ..

كان الكل نايم لما وصلت من الجامعة .. صح كانت خايفة .. صح كانت مرتبكة وماودها , بس لازم تقدم على هالخطوة .. عشان فدوى .. ولانها الوحيده اللي تقدر تكلمه ,, حست فجأه ان الحظ غصب يجمعه فيها .. وضحكت على نفسها بسخرية لما قالت لها " تخيلي انتي تتزوجين فواز .. احسج صراحه تحبينه مو بس تشفقين عليه "فواز .. " "حلوه ذي اتزوجه .. اللي يسمعج يقول الحين ما كأني لذاك الشي ثابت , ولاكأن ابوي وجدي فرررييي مره ! ,,

فز فواز للتلفون اول مادق : الوووووووووووووو
ديم باحراج " هـ .. هــلا
فواز ماميز الصوت : مين ؟
...... : انا ددديم . صدددديقة فدوى ..
ابتسم فواز وسوى حركة لمشعل برجله كنه يشوته ومشعل فقع ضحك وقال وهو طالع ( مو صاحي الولد بعد شكله يشبك بنات ) ..!
...... : هلا ديم ..
ديم ماعرفت شتقول : امممم , فدوى تسلم عليك ..
..... فهم فواز ان اهله مانعينها : عليك السلام .. وعليها ..
...... : .......
...... : ديم
ركزت ديم شوي في طريقة نطقه لاسمها : هلا
...... : فدوى ؟ شخبارها .. تنتبهون لها عسى ؟ ماتتعب ..! ها ؟
......تحمست : اكيد والله انها في عيوننا يافواز , قسم بالله اني مادقيت عليك الا عشان اطمنها ووالله مابيها تتعب
.....ضحك : طيب .. لاتعصبين ..!
ضحكت على نفسها لانها شدت اعصابها ومنحرجه منه , مهما كان فهو شاب له صوت شاب وتفكير شاب برضو ..
..... : طيب , تزوج فهد ؟ ولا ..؟ مو راضي يقول لي .. مشعل
.....ارتبكت : لا, مو الحين لسه تو الناس ...بس أنت لاتشيل هم بكيفهم
ابتسم فواز : ديم .. اول فدوى تقول .. مانبي .. اللي مايبينا
..... : ..........
.... ضحك ولو انها مو من قلبه : ههههه , الله يوفقهم ..
...... : طيب معليش بسكر ..
فواز وكأنه ماوده بس مايبي يحرجها ويخاف يلخبط بالكلام ويفتشل من نفسه زياده : اوكي , شكرا ديم
..... : عفوا .. باي
سكرت ديم وظلت واقفه بمكانها بغباء .. ! حتى ياسر وناصر صحو شافوها وماتوا من الضحك

ياسر : هههه كأنج .. تمثال ههههههه
ناصر يحرك يدينه في الهوا : هآآآي ديم هاااااااي
ديم انتبهت وضحكت : هاااا شتبون ؟
ناصر : الللله يخليييج سووووي لنا زي هذااااك اللي تسووووينه
ياسر : ايه و الله حلقي يعورني هذاك حلو حاااااار فيه شوكلاته
فهمت ديم ان قصدهم هت شوكلت وضحكت : اسوووووي كل اللي تبوووون مدام الاخت جيني طست فأنا أقدر اخذ راحتي ..

فرحوا العيال وهي راحت للمطبخ تفكر بفواز شوي وشوي تطالع المطبخ من غير الشغالة الغبية اللي راحت وريّحتهم , بس ماتوقعت ابد .. انها ممكن بيوم تخاف من ام ياسر زي كذا ..فرحت ان لها سند وناس كثير تحرص عليها ..
دارت شوي في المطبخ وضحكت على نفسها وضحكوا العيال وراها

في الجهه الثانيه .. فهد يفكر .. مازال مقهور من رهف .. خطب صبا عشان بس يقهرها ويقهر اخوه ..

ومافكر في نفسه .. عشان كذا جلس للحظات يحاول يتذكر شكل صبا وشخصيتها .. والمواقف اللي صارت له معاها .. يمكن يقتنع شوي باللي هو سوّاه ..