الفصل 6
البارت السادس
الشاب وصل عندها وسئل باستغراب ونبرة تعالي :من انتي ؟!
بروق شملته بنظرة تقييمية طويل قمحي يميل للنحف فيه شبه كبير من ابونادر وابوجابر اكبر من نادر واذا اخذت بعين الاعتبار ان الأب يكنى باكبر اعياله فهذا يعني انه ماهو من عيال ابونادر غير ان عيال ابو نادر كلهم فيهم لمحه من امهم باستثناء يوسف الي وجهه كله لامه ومافيه اي شبه لابوه كل ذا ادركته في اللحظه الاولى من وقوف الشاب قدامها
نبرته المتعاليه ماعجبتها وحست انه خرب جوها تكلمت وقصدها تغثه زي ماغثها : انا من بشاير المطر ...
الشاب حس انها تستظرف نفسها رد بسخريه واهو فاهم ان اسمها له علاقه بالمطر بس ماقدر يخمنه برق ورعد كلها ذكوريه : شايفتني بدوي كاشت ؟
بروق باستفزاز لانه مازال يتكلم معها بشوفة نفس
: بدوي كاشت احسن من بليد مايعرف وشهي بشاير المطر على بساطتها !
الشاب تنرفز ورد عليها بنفزه : العب معك فوازير انا تكلمي عدل اشوف... من انتي ووش جايبك هنا واذا من صديقات البنات عز الله لاقطع رجلك من هالبيت ..
بروق ردت بغيض من جاء واهو يكلمها من طرف خشمه وكأنها شي تافه قدامه : للاسف ماتقدر تقطع رجلي لاني من اهل البيت عاد شف ليه محد قالك ...واضح انك فرد مهمش ؟!
الشاب عصب منها وفي نفس الوقت اشغله كلامها وبتفكير سريع مستحيل تكون من اهل البيت الا اذا ؟!صرخ عليها
: مستحيل نادر يتزوج بالسرعه ذي ومن غير مايقولي ...
بروق ببرود واهي مبسوطه انها اقدرت تثير اعصابه : اتفق معك بالنسبه لشخص تقليدي مثل نادر يبيله اقل شي ست شهور علشان يتخذ قرار الزواج ويخطط لزواجه وماهو مخلي احد ماعزمه على عرسه
الشاب وصل اعلى مستويات الاستفزاز من المعنى الي وصله : اصلا مانتي كفو تاخذين نادر حدك الي ماهو تقليدي بفجوره يوسف الوصخ
بروق بحده : يوسف وش ماكان وصفه عندك فهو ينتميلك ويشاركك نفس الاسم ونفس النسب واذا لابد واحد منا ينتقص الثاني لسبب قرابته من يوسف فالاكيد اني راح اكون صاحبة هذا الحق
الشاب بعصبيه : لاطبعا مايحقلك انا قرابتي فيه انفرضت علي غصب وانتي تزوجتيه برضاك
قاله واهو يشملها بنظرة احتقار سكت للحظه وكمل بصيغة استخفاف وكراهيه للي تجلس
قدامه بكل اريحيه وكأنها عايشه في هالبيت من اسنين : واضح انك ماخذتي في يده ساعه !.......وحده تافهه مثلك بس تشوف واحد مزيون تدلع فمها قدامه وترمي نفسها تحت ارجوله
بروق عصبت من كلامه فزة واقفه وصرخت عليه: التافه هوالي يبني احكامه جزافا واهو مايدري عن شي وماهو انا الي ترمي نفسها لأحد فالتزم حدودك قبل لاتتحاسب على كل حرف تتلفظ فيه
توسعت عيونه من اهياطها ومن هي بس علشان ترفع صوتها عليه صرخ بصوت اعلى : ومن انتي علشان تحاسبيني على ............قطع كلامه بسب
الي اندفعت مثل الطلقه بينه وبين الطاوله
الي تجلس عليها بروق
غزل واهي تدفه بكل ايدينها :عمي ستوب ستوب
لاتتهور انا متاكده انك فاهم غلط
وقبل لاتعطيه فرصه يرد التفتت على بروق بعصبيه واهي تغرس ايدينها في وسطها : وانتي تمشين وتهاوشين مع الخلق بعدين وشلون تطلعين للحديقه من غير ماتقولين لي وانا من اليوم رايحه جايه قدام جناحك احتريك تطلعين وشفقانه عليك من الازعاج اقول اخاف اطق عليها تكون نايمه والاشي
عمها لفها له بغيض من هذرتها : منهي ذي ووش جايبها هنا
غزل باستعباط ماهو محله قربت منه تسلم وتبوس اخدوده :عمي حبيبي متى جيت
انقهر منها نفضها بعضدها : ردي علي مثل الناس لاالفعك
غزل توهقت خايفه يهب في وجه بروق لاعرف انها زوجة يوسف يكفي انها جت واهم يتهاوشون وماتدري وش سبب الهوشه قطع تفكيرها نفظت
عمها لها مره ثانيه : انطقي اشوف
غزل بعصبيه : هذي بروق زوجت يوسف والاتفكر حتى انك تزعلها لان ابوي حاطها في حمايته وفي وجهه ولو عرف بس انك رفعت صوتك عليها بيغسل اشراعك
عقد حواجبه بعدم فهم زوجة اولده وش داعي انها تكون تحت حمايته وفي وجهه وش لازمة هالكلام الكبير ذا .......
بروق ارجعت تجلس رغم غضبها بس ماتبيه يحس وكأنه انتصر عليها بقذارت السانه بدت تتفرج عليهم وتشرب شاهي بغيض لمتى واهله يحاسبونها على اخلاقه وافعاله المفروض انها هي الي تحاسبهم لانهم هم اهله هم الي صنعوه
غزل تحاول تهدي الوضع : بروق هذا عمي جواد هو ونادر عايشين في نفس الجناح
ماشافت تفاعل من بروق التفتت على جواد
: عمي هذي بروق بنت جاسر الماجد
جواد توسعت عيونه بدهشه جاسر الماجد مزوج بنته ليوسف !! غريبه كيف واحد بمكانته يعطي بنته لواحد لااخلاق والادين الا اذا يوسف لاعب عليهم اويمكن مغتصب البنت اوهي وصخه ومخاويته رفع انظره لها للحظه مايدري ليه موبالع سالفت انها وحده داشره وحتى يتخلص من هالحيره سحب واحد من الكراسي وجلس وغزل بعد اجلست واخذت الزمزميه تصب لعمها ولها شاهي جواد رفع انظره لبروق وبهدؤ يناقض هيجان افكاره الداخليه : وش السالفه
بروق بحده بسب قذفه لها من اشوي : اي سالفه
جواد بتصبر : سالفة زواجك من يوسف ووش الي يخلي اخوي يحطك في وجهه دامك زوجة اولده
وصرتي وحده من اهل البيت يعني شي طبيعي لك مثل الي لغيرك من اهل البيت من حقوق وواجبات واحترام
بروق بتهكم: اهااااا تعرف الاحترام طيب والي من اشوي كان يقذفني رغم ان اول شي خبرته فيه اهوا اني من اهل البيت وش وضعه بالضبط !
جواد زم شفايفه بغيض يحاول يكبت غضبه بالقوه
ومَراده عنها الا كلام غزل الي عجز يفسره وحاس ان الموضوع فيه سالفه كبيره فجأه تذكر الشخص الي ممكن يخبره بالسالفه من غير مايضطر لمقابل
هالبروق ......بروق !! وع وش ذا الاسم
: ماقذفتك بس انتي الي جايبه لنفسك الشبهه بذا الزواج
بروق ارمته بنظرة احتقار وبغيض: انا فوق كل الشبهات واذا ولدكم منحط انتم الي تلحقكم الشبهه ماهو انا
تجاهل كلام بروق مايبي يازم الوضع اكثر واهو مايدري وش السالفه خاصه بعد ماعرف بنت من التفت على غزل : غرور وينها
غزل تاشر باصبعها لفوق : في غرفتها
جواد : وامك
غزل : امي وابوي ونادر وجدي راحو كلهم لاهل بروق
توسعت عيونه باستغراب هو داق على نادر وقايله
انهم عند رجال وسكر بسرعه بس سالفت انهم كلهم
عند اهلها ليه وش يسوون اهناك : وليه رايحين لهم
غزل خافت تجيب طاري الحفله يفتح تحقيق جديد
قالت بتهرب : مدري عنهم
جواد لاحظ انها تتهرب من الرد فضل يروح لغرور ويفهم منها السالفه يمكن غزل ماتقدر تتكلم قدام البنت قام واقف : انا رايح لغرور
اول ماراح تاركهن انقزت غزل جنب بروق وامسكتها بيدها : بروق تكفين لاتزعلين من عمي هو كذا يكره
طاري يوسف واي شخص يصف مع يوسف
بروق بغيض : كرهه ليوسف مايعطيه الحق بالتطاول علي بس علشان تزوجت يوسف
غزل باسف : ادري والله ادري بس انتي ماتعرفين شي عن المصايب الي سواها يوسف وانا متاكده ان عصبية عمي اغلبها من خوفه عليك وانتي شفتي بعينك كيف اهلي كلهم رافضين يزوجونه علشان مايحطون ذنب البنت الي يتزوجها برقبتهم ولولا الفلم الي سواه علشان يتزوجك والاكان محد عطاه وجه
بروق عقدت حواجبها بتفكير وش مهبب هاليوسف
وبتحقيق : وش سواء يوسف علشان يخافون على البنت الي يتزوجها ؟
غزل انبهتت كله والاهالموضوع اهي ماصدقت تتخلص من كوابيسه وللحين تخاف تقعد مع يوسف الحالها بسببه مستحيل تفتح هالسيره الي تسود الوجه تكلمت بعصبيه غير مبرره بالنسبه لبروق
: قلتلك من البدايه لاتسئليني عن مصايب يوسف
روحي اسئليه انا مالي شغل في هالسوالف خل اروح اذاكر اصرفلي
وقامت من عند بروق متجهه لداخل بخطوات سريعه غاضبه
_________
في غرفة غرور
جواد باستغراب : هي الي قالت لكم هالكلام
غرور : لايوسف هو الي قال لاهلي وانا علمتني غزل
جواد بقهر : معناته البنت واهلها انخدعو بيوسف وماكانو يعرفون عنه شي ويمكن يوم قال لهم اسم العائله اعتمدو على سمعتنا الي تصدح في البلد كله والانشدو
غرور : اتوقع والاليش تحتمي بابوي وتطلب لها جناح الحالها
جواد حس بالحرج من بروق وتعامله معها : المشكله انا جبت العيد معها واذا تبين الصدق حتى بعد كل الي عرفته ماني قادر اتقبلها احس انها شايفه نفسها ومتكبره
غرور اضحكت : ههههههه حرام عليك بالعكس البنت طيوبه وتجنن وترا ثائر سفل فيها قبلك ومشتها له علشان جدي قال امسحيها في وجهي
قامت سكرت كل الموضوع بمافيه كلام ثائر
جواد رفع حاجبه باستغراب : حتى ولو ماهي نازله من هنا
قاله واهو يأشر على حلقه
غرور ببرود : كيفك بس اعتذر منها قبل يجي ابوي وجدي ترا بيزعلون اذا عرفو انك مزعلها
جواد نفخ بضيق : اف لاتقولين ابوي حبها
غرور بتأكيد : مسوي معها رياضه الصبح وطول الظهر مدوشنا بمدحها
____________
في غرفة خزام
هزاع باستنكار : ياخي انت مجنون تحب وحده بس علشان لقيت شعرها مقصوص وفديو مسجل واهي تبكي وتشكى لابوها
خزام : عاد هذا الي صار ماهو في يدي ياهزاع من سمعت صوتها واهي تبكي وترجي ابوها انه يتم يفتخر فيها مهما صار عليها لانها مستحيل تخونه وان صار لها شي بيكون غصب عنها احس بحرقه في قلبي ودي اعرف وش صار عليها
هزاع : هو...هو علينا ماتدري يمكن تفلم على راسك
خزام تكلم بحرقه : هزاع لاتستخف فيني ماني غبي
اصدق اي شي وانا متاكد انها كانت صادقه في كل كلمه قالتها
هزاع : طيب ورني الفديو حقها بسمع بنفسي ياخي ابي اي شي يقنعني
خزام بغيره : تحلم اسمعك صوتها لو تموت ماخليتك تسمعه
هزاع يتربع على السرير : ياسلام يعني انت تسمع البنت وسوالفها وانا توريني القرود اهلها وش اسوي فيهم
خزام بحده وجديه: هزاع الزم حدك عاد قلتلك بدورها لين القاها واتزوجها واهلها كلهم مزاين وين القرود في الموضوع
هزاع : وانت ماتبيني اسمع وش قالت بس علشانك بتتزوجها ترا بجي اتكي عندك انت وياها وبتقهويني اخت مشاري واسولف معها وجها لوجه وقدامك
خزام : تخسي ان شفتك متعدي قسم الرجال حشيت ارجولك
هزاع يتصنع الزعل : هذا وانت ماتزوجتها بعتني
خزام زهق من اهبال هزاع : خل عنك السماجه وقلي الحين كيف القاها
هزاع شاف حال خويه مايسر وبجديه : اسمع ابوها وجهه ماهو غريب كني قيد شفته
خزام : حتى انا احس اني اعرفه اتوقع قيد شفتله
صور بس وين وين مااتذكر
هزاع : المشكله ماقالو اسمه
خزام : وش رايك نسوي بحث عن اسم مشاري يمكن نلقاله احساب في الانستقرام اوتويتر
هزاع طلع جواله وفتح على الانستقرام وبدى يبحث
: انت ابحث في تويتر
بعد فتره زفر خزام بضيق : اف لقيت شي
هزاع : ياكثر الي اساميهم مشاري بس والاواحد له نفس الصوره وباقي كثير مالحقت اشوفهم وانت
خزام بطفش : نفس الشي والحل الحين
هزاع : وش رايك نعلم عروب يمكن تقدر تساعدنا
خزام : وكيف بتساعدنا عروب
هزاع : يمكن تكون البنت معها في الجامعه
خزام : وافرض كيف بتعرفها حنا مانعرف الا ان اسمها بروق واخوانها رعد ومشاري وعمها صقر وكم واحد من اعيال عمانها وابوها وعمامها مانعرف اساميهم
هزاع : لو البنت معهم بتنتشر سالفتها في الجامعه
ماهو كل يوم تضيع بنت من اهلها
خزام : لوهي سامعه سالفه زي كذا علمتنا
هزاع : ماتدري يمكن تسمع والاتقول لاحد
خزام : لا بلاش عروب اخاف تعلم الهبله سحر ثم تصير سيرتنا على كل السان
هزاع : اف اجل كيف بندورها
خزام : مدري انا كل يوم اطلع الف في الشوارع والاسواق لعل اشوف احد منهم
هزاع : خاين من جد وصارلي اسبوع انشدك وين تطس وين تروح ومخبي علي
خزام : غصب عني انا لحد الحين ماني مستوعب الي صار
هزاع : وعمتي وريتها الصور والفديو
خزام : لا هي سحبت الكلام مني بس ماعلمتها بالسالفه كامله كل الي تعرفه اني احب وحده اسمها بروق .... على طاري عمتك تراها تقول عروب زعلانه علينا وتبينا نمرها ناخذها نمشيها
هزاع : تكفى لاتقول ازعلت علشان نزلت سحر في بيت ابوها البارح
خزام : الا اصلا عروب بعمرها مازعلت علينا الاعلشان ذالعله
هزاع : ترا سحر طول عمرها لاصقه في بيتكم ولكنت تتكلم وش الي جد
خزام : الي جد ان خالي لمحلي انها تخطب ومدري ايش وكانه يبيني اخطبها غير الشباب ذاك اليوم يقطون كلام متى بتخطب وشكل امك حاطه عينها على ناس اربعه وعشرين ساعه مسنترين عندها يعني العالم ملاحظين انها دايم عندنا
وصارو يحشروني في السالفه غصب
هزاع حك راسه عاد لو اقولك قبل كم يوم لمى دخلت على خواتي وش سمعتهم يتكلمون فيه ....
: ترا سمعت طراطيش كلام ان سحر تحبك
خزام توسعت عيونه : نعم ...ومن قال هالكلام
هزاع : انت ماعليك من الي قاله المهم انها سالفه متداوله
خزام : هذا الي كان ناقصني على كذا لازم اكلم عروب تبعدها عن طريقي
هزاع : اقول قم خل نروح نشوف ذا الدلوعه وش مزعلها وتراك من جد مدلعها
خزام : تستاهل الدلع عروبه
_____________
في الكوفي
عذبه لابسه بنطلون جنز وبلوزه قطن ثقيل طويله
وجاكيت جنز طولها متوسط جسمها مليان في اتزان انيق شعرها متوسط الكثافه والطول جمالها ناعم هادي جذاب بغموض الي يجلس معها تتكون عنده رغبه في تأمل وجهها من غير ماتكون عنده فكره واضحه ايش الي شده في وجهها بضبط
باختصار هي تجسيد حي لأسمها عذبه
توها اطلعت من المطبخ الملحق بالكوفي بعد ماشرفت على تتغيير زيت القلي في القلايات
الي يقلون فيها الدونات ..... حريصه في شغلها وتحب تشرف على كل شي بنفسها
اوقفت امام كاونتر تسجيل الطلبات تاخذ طلبات الزباين واهي ترمق عروب بطرف عينها
دونت طلب الزبونه وانقلته للعامله المسؤله عن تجهيز الطلبات مرت على عروب وسحر الي حاطات روسهن في بعض ويسولفن امسكت الثنتين باذانيهن تفركها بلطف : وانتن عبء على العمل مامنكن فايده
سحر خمت اذنها بسرعه وبتبرير : اي عمه لاتشمليني مع اختك الكسوله انا من اليوم اشتغل هي الي جتني وعطلتني
عروب ماهتمت بفركة عذبه لاذنها الي اساسا خفيفه ومسويه زعلانه زمت شفايفها واهي تطالع
عذبه بنص عين : اشوف ولدك ماجاء وين الي قلتي بيطلعني والاتلعبين علي انتي وياه بزر عندكم توعدوني لين اسكت وتسحبون علي
عذبه امسكت راسها بيدينها الثنتين بحركة تهويل
: الله الله ياكبرها ياعروبه وانا وولدي متى ردينالك طلب والامتى لعبنا عليك
عروب تورطت هي تبي تتزيعل وتخلي عذبه تراضيها بس انها تسئلها مثل هالسؤال مافيها تجاوب لانهم مطيرينها للسماء ولو امها وابوها حيين ماعاشت معهم ربع النعيم الي عاشته مع عذبه وخزام خاصه من ناحية المحبه والدلال
في النهايه ماقدرت تعترف بالحق حورة السالفه
وارفعت يدها قدام وجه عذبه بزعل : هه شوفي الساعه كم وينه خزاموه ماجاء
عذبه امسكت كفها تربت عليه : ماعليه انتظري شوي تراه قايل بعد صلاة المغرب على طول بيجي والصلاه باقي عليها وقت
عروب ابتسمت بدلع : واخذ سحر معي
عذبه بحزم : لا
سحر انخطف لونها بفشله
وعروب انفخت : اذا سحر ماراحت معي ماني برايحه
عذبه توهقت فيها : عروب سحر مايصير تطلع معك
لاتنسين انك طول الوقت مع خزام وهزاع
سحر بزعل : اصلا انا ماابغى اروح
عذبه امسكتها بيدها : سحر انا اقول هالكلام علشانك انتي مايصير تطلعين في سياره كلها شباب مانهم محارم لك
عروب باصرار : انا معها ماراحت الحالها
عذبه باصرار اكبر : لوكانت بنتي ماسمحت لها تطلع مثل هالطلعه حتى لوانتي معها واهي بنت اخوي يعني بنتي انا بعد ومافيه روحه بتروحين معهم الحالك والااقعدي تبغين سحر معك اطلعن تعشن في المطاعم الي في ذا المجمع بالمره اذا احتجتكن تكونن قريبات
سحر ازعلت من قلب واحقدت على عمتها ليه تحرمها من فرصه مثل هذي بتكون فيها قريبه من خزام : انا محمد كلمني وبيجي ياخذني الحين
قالته واستدارت داخله لغرفة عمتها الخاصه تتصل
باخوها محمد علشان يجي ياخذها
عروب عصبت : شفتي زعلتيها
عذبه بجديه : عروب لاتخلين حبك لسحر يضرها انتي خالت خزام وعمة هزاع محد يقدر يقول فيك شي لارحتي معهم بس سحر غير واحد ولد عمتها وواحد ولد عمها وش تبين الناس يقولون عنها واهي رايحه جايه معهم في كل مشاويرهم عيب مايصير
عروب بمنافخ : قطع السان الي يجيب طاريها بحرف اصلا كلهم يعرفون انها ماتطلع الامعي
عذبه ازفرة بنفاد صبر :اف عروب باختصار سالم كلمني يقول اذا خزام يبي البنت يخطبها رسمي
والالايشيلها معه في سيارته ويجيبلها الكلام
عروب ابتسمت بفرح : عز الطلب يالله نخطبها لخزام
عذبه توسعت عيونها بتعجب من اختها : وش قالولك خزام بزر اجره بيده واخطبله الي ابي
خزام مايبغاها
عروب بالحاح : مهوب على كيفه قولي انك ماتبين احد غيرها
عذبه بجديه واهي تنطق كل كلمه الحالها لعل هالعروب تستوعب : الا على كيفه وماراح اخطبله الاالي هو يختارها بنفسه وسحر اولا ماتناسبه ثانيا هو مايبيها ثالثا انا ماازوج اولدي وحده تخلت عن ادراستها ومستقبلها علشان كلمه اسمعتها من واحد ترسم عليه وماتدري اذا هو يبيها او لا
قالته واتركت عروب راجعه لزباين وطلباتهم
اما عروب انذهلت بكل مالذهول من معنى ماتوقعت ان عذبه تعرف عن كل شي كانت تظنها على نياتها وماتنتبه !!
____________
بيت ال عامر بعد المغرب وقت اجتماع العائله اليومي
كلهم موجودين في الصاله ماعدا ثائر طالع مع اصحابه ويوسف باقي مانزل وهذا هو الوقت الي متعود يصحى فيه
العاملات ادخلو بصواني القهوه والشاهي والحلا للقهوه والمعجنات للشاهي صفو الصواني على الطاوله واطلعو في نفس الوقت ادخلت بروق
: السلام عليكم
وعليكم السلام رد جماعي باصوات متفاوته
بدو يصبون القهوه ويتقهوون
ابوجابر : ابوك يسلم عليك يابروق
بروق : الله يسلمه يارب حياتي انا وشلونه
ابونادر بمزح : مابه الا العافيه ازعجنا بين كل كلمه والثانيه يسئل وشلون بروق
بروق تضحك : هههههه بعد عمري والله ابوي لحد الحين ماهو مستوعب اني رجعت له
ابوجابر : الله يخليه لك ويخليك له
بروق : اللهم امين ويخليلكم احبابكم يارب
امين
ام نادر : ماشاء الله على امك الجلسه معها ماتنمل
بروق التفتت على خالتها واهي تبتسم من تحت النقاب : ياجعلني فدوه لها امي انسانه اجتماعيه وتحب تتعرف على ناس جدد
غزل بحماس : انا شفت محاظره لها عن الوقت وتنظيمه شكلها في البيت ممشيتكم على المسطره
بروق بضحكه : ههههه موب لذي الدرجه كل شخص عنده المسطره الي تناسبه .....
ارفعت فنجانها لفمها ترشف منه ثم ابعدته عن فمها محتفظه فيه بيدها حست
بريحة الدخان الي انتشرة في الجلسه فجأه التفت لمصدر الريحه وشافت يوسف يدخل لصاله بكل برود لابس جنز وقميص ابيض وفوقه جاكيت وشعره سايح ومبعثربعكس كل المرات الي شافته فيها كان دايم يسويه سبايكي مافاتها نظرة الاحتقار والكراهيه المتبادله بينه وبين جواد تقدم للكنبه المنفرده على يمينها وجلس من غير لايرد السلام الحركه الي خلتها تحس بالإهانه الي زاحمت خليط من المشاعر تجاهه احساس بالشفقه عليه وعلى حالة الضياع الي يعيشه احساس بالا حتقار له ولدنائته احساس بالأشمئزاز من المعلم الانثوي المتصدر لشكله الخارجي ....... انسدل شعره على وجهه الجميل ووصلت بروق لاقصى درجات الاشتعال لمى رفع يده يبعد شعره عن عينه بحركه عفويه نزلت فنجان القهوه الي في يدها على الطاوله بغيض واهي تحاول تسيطر على اعصابها لكن هالمحاوله تبددت لمى رفع راسه ناحيتها على صوت الفنجان المرتطم بالطاوله بطقه مسموعه وشافها تتأمله وبكل وقاحه سحب نفس طويل من الزقاره ونفخ نفس الدخان في وجهها.... ثارت كل باركين القهر فيها
وبحركه سريعه اخطفت الزقاره من يده واهي تفز
واقفه وترميها على السيراميك وتدوسها برجلها بانفعال يوسف ماتوقع حركتها ولمى استوعب انها اخذت الزقاره من يده فز واقف مواجه لها ولقط يدها الي اخذت فيها زقارته
وصار يعصر معصمها في كفه : قد الحركه ذي
ارفعت عينها في عينه واهي تقرب وجهها من وجهه بتحدي قطع عليهم المشهد صوت جواد : وش متوقعه من واحد سافل
جاه الرد بصرختين عنيفه انطلقت في نفس الوقت
يوسف : انت تنكتم احسلك
بروق مانست وقاحة جواد عليها العصر : مالك دخل حنا نخلص بينا
ابونادر رفع حاجبه لجواد وابتسم وكانه يقوله تستاهل
الباقين اوصلتهم الرساله من الي صار لجواد واكتفو بالمراقبه
جواد حط رجل على رجل وقعد يتفرج عليهم باحتقار لاالاثنين
يوسف وبروق ماخذ منهم الرد على جواد اكثر من لحظه ارجعو بعدها لساحة المعركه بروق استغلت مقاطعة جواد لهم حتى تسبق بالهجوم اصرخت فيه بقهر : الاساليب الرخيصه الي تستخدمها مع الرخيصات الي من وزنك لاتستخدمها معي
يوسف زاد من ضغطه على معصمها واهي حست انه راح ينكسر في يده من قو الوجع بس تصبرت ماتبيه يتلذذ بوجعها يوسف رد عليها بتهكم :
على الاقل مابعد احد غلفني كهدية شكر
ردةبتهكم مماثل تستفزه رغم الالم الي يتفجر في معصمها من ضغطه عليه : في الواقع الهديه كانت مفخخه وماراح تطول من البروق الاصاعقه تسحق صلتك بعالم حواء للابد
غمزلها بروقان : ويمكن انا الي اسحق صلتك بعالم ادم للابد
بروق اسحبت يدها من يده بقوه واهو تركها ارجعت خطوه لورى مما خلى جواد يتكهن ان السالفه راح تنتهي هنا واهومابعد شفى غليله من يوسف وواضح ان هالبنت تعرف كيف تعطيه من وين مايوجعه نطق بتشره : الشرهه والله على عيال عمك الي خلوك تطلعين من بينهم والاهالسربوت محد يعطيه التفتو عليه بروق ويوسف بحده وكان يوسف اسرع بالرد وكان رده موجه لبروق لان جواد مايعنيله شي رجع يلتفت لها واهو
يتذكر انه سمع طاري ان احد من اعيال عمها يبيهانطق بتحدي: اخذتها من دون اعيال عمها طرق
كلمته كانت طعنه لبروق خلتها تحس ولاول مره انها اجرمت في حق سياف منهو ذا التافه حتى يتفاخر عليه انه اخذها من دونه ولابعد يزعم انه اخذها طرق
طيرة عيونها فيه بقوه ويوسف حس كلمته اصابتها في مقتل ارجعت خطوه ورى واهي تنتفض من الغضب واصرخت عليه واهي تهز اصبعها السبابه في وجهه بقهر : ماخذت غير حبر على ورق وولله اني ابعد لك من البرق الي يلوح في السماء
يوسف انهد عليها بيذبحها على ذا الكلمه لكن
نادر وجواد كانو اسرع منه وتشبثو في ايدينه حاجزينه عنها وهنا ادركت ان صفقتها الرابحه كانت في انها ادخلت في وجه ابو نادر
يوسف زاد قهره اضعاف واهو يشوف اخوه وعمه مربطينه عنها قام ينفظ نفسه منهم بهيجان هستيري لولا قوة الشخصين الي ماسكينه والاكان طارو من قو ماينفظهم عنه اختلطت عليها الاصوات وكلن يتكلم من عنده ماتدري وش يقولون والااهتمت لاي احد منهم كل تركيزها مع النمر الهايج الي يتفلت بكل قوته يبي يوصل لها وطبعا محد من الموجدين يعرف انها مازالت عذرا الااذا كانو افهمو كلامها بنفس المعنى الي اقصدت توصله ليوسف كان يتفلت من ايديهم وهويصرخ بهستريا بابشع انواع السباب والشتايم
: بتندمين على هالكلمه ياحيوانه ياحقيره انا اعلمك كيف اخذك بالطول والعرض حلفت لااندمك
حست بنشوه واهي تشوفه كيف مربط والايقدر يوصل لها تكلمت بتشفي : محد غيرك بيندم وحدك سقط المتاع الي تعرفهم
نادر صرخ فيها بقهر : بااااااااس انقلعي لجناحك والاوالله اني لافكه عليك
يوسف يصرخ على نادر : فكني يارمه فكني ماتسمع الحقيره ذي وش تقول
نادر رغم احتقاره لتصرفات يوسف بس يكره طريقة بروق في الكلام معه بفوقيه واستفزاز تغثه ويتمنى لوتسويها مره واهم الاثنين الحالهم علشان يوسف يمسح فيها البلاط
بروق تدري لو انطلق عليها ماراح يصير لها خير غير ان العائله بأكملها ثارت والكل يصارخ من عنده احد يصارخ على يوسف واحد يصارخ عليها هي واحد يحاول يهدي الوضع
استدارت طالعه من عندهم واول مادخلت جناحها
قفلت الباب وراها ورصت ظهرها عليه واهي تنزع نقابها بسرعه وتفك طرحتها تحس انها اختنقت من كثر القهر الي تحس فيه لازم تتخلص من هاليوسف وبأسرع وقت مستحيل تسمحله يوصل لها بعمرها ماراح تكون رقم يضيفه لعدد حريمه اخذت نفس عميق وازفرته بنفخه واهي تحس بألم فضيع في معصمها ارفعت يدها قدام وجهها وبدت تتفقدها بيدها الثانيه شافت مكان يده محمر مره وبادي ينتفخ التفتت على الباب وراها تعلق نقابها وطرحتها على صف المشاجب المثبته على الباب
نزلت عباتها وعلقتها معهم وراحت للمطبخ افتحت الثلاجه تدور ثلج تكمد فيه معصمها والالقت اتجهة للمغسله افتحت صنبور الماء ودخلت يدها تحت تدفق المويه البارده واهي تدلكها بلطف استمرة دقيقتين ثم سكرة المويه وراحت لغرفة النوم تبدل
ملابسها واهي تحس بحاجه ماسه لممارسة طقوس
التهدئه الي تعودت عليها افتحت دولاب الملابس
واسحبت بجامه مريحه تتوسع فيها وبدت تبدل ولأول مره تقوم بهالطقوس يومين وراء بعض
كانت تمر عليها شهور طويله قبل لاتوصل للحد الي
يحوجها لممارسة هالطقوس البست وارجعت للمطبخ تسوي الهوت شوكلت واهي تحمد ربها انها جابت عدتها الخاصه معها طلعت الكوب الاسود اغسلته وصبت المشروب الساخن فيه
اخذت علبة التشوكلت الغامقه واضافتها للصينيه
وراحت لنفس المكان تبع المره الي راحت نزلت الصينيه على الزوليه الصغيره وجابت المخده نزلتها في الارض واجلست عليها اسحبت جوالها من جيب بنطلونها وشغلت شيله حربيه نزلت الجوال جنبها واخذت
اول حبة شوكلاته واكلتها واهي تذكر كل الي صار بينها وبين يوسف ...... تكرهه تكره فجوره تكره خيانته تكره عدم مبالاته وانحطاط اخلاقه تكره ارتباطها فيه واهو مايستحقها .........هي كثيره على الكفو وشلون عاد الردي؟! ...........بس ماعليه يايوسف اخذتك لسبب والسبب انقضى وبتشوف كيف ارميك مع شباك حياتي بس ماهو قبل تعرف حجمك ماهو قبل اعلم كل واحد رفع خشمه علي من اهلك بسببك منهي بروق ووش تقدر تسوي !!
............تتابعت حبات الشوكلاته لفمها بتتابع رتيب مع كل حبه تتسع افكارها وتغوص في اعماقها اكثر ...... بدا الحماس يدب فيها فجأه مع الفكره الي المعت في ذهنها اخذت الكوب شربت منه رشفه ونزلته بسرعه واخذت جوالها سكرة الشيله وبدت تشتغل عليه بنشاط وعيونها تلمع ببريق المكر والوعيد !!
_________
دخل مع باب الشقه واهو مازال يغلي من الغضب
ركل الكرسي المعترض في طريقه بعنف وكمل
طريقه للكنبه الطويله الموجوده في صدر الصاله رمى نفسه عليها واهو يتكي بمرافقه على اركبه
ويرخي راسه بين اكفوفه واهو يخلل شعره باصابعه
شاد الشعر على ورى .......ممدوح سكر باب الشقه وقفله
وجاء جلس على الكنبه الي جنبه وبتكمله لسوالفهم في السياره : ياخي دامك تبيها ليش تخونها من اول ليله والابعد متعمد انها تعرف بخيانتك
يوسف : وانا وش دراني انها مصيبه كذا دخلتها في بيت ابوي خلت كل شي يطلع من يدي
ممدوح : بس لاتنكر انها بحركتها ذي سوت فيك معروف وردتك لبيت عمي من غير ماتدري ومن غير
لاعمي يعترض او يفرض عليك شروط
يوسف : وفي نفس الوقت ربطتني ياخي انا كف مقدر اعطيها ولد عمك وعمه العله مسوين فيها محامين دفاع
ممدوح ضحك بشماته في يوسف : هههههههه تستاهل على بالك كل البنات مثل الخمه بنت عمك
يوسف كشر بقرف : الله ياخذك انت وبنت عمك معك لاتجيب طاريها
ممدوح بجديه : نصيحه خل عنك بنات ابليس واكسب زوجتك قبل لاتطير من يدك ترا مهوب كل مره بتلقى زوجه مثلها
يوسف بقهر :هالحين خلها تعطيني وجه البنت شايفه نفسها ومتكبره وتناظرني بنص عين الظاهر ان ابوها غاصبها على الزواج
ممدوح باستغراب : ياخي ابوها انسان اخلاق وطيب ماتخيل انه من القشران الي يغصبون بناتهم وبعدين انت ماشفت كيف يتفاخر فيها في العرس شكله معطيها على جوها
يوسف يميل براسه جهت ممدوح : اذا هي ماخذتني برضاها ليه ماحس انها مهتمه بزواجنا البنت والاهي مفكره فيني
ممدوح : ماتقول انها اجلست في بيت عمي وسوت الفلم الهندي الي سوته علشانك ماتصلي اكيد هذا هو السبب
يوسف زفر بضيق : اف اقول قم خلنا نروح لشباب
الليله فيه وجوه جديده قم خل نفلها بلا زواج بلاهم
والعله ذي لاحق عليها وعلى غثاها
_________________________
ادخلت لغرفة همس واهي تشيل في يدينها الثنتين ساندوتش دجاج واضح انه غني بالحشوه من منظر الخس والجبن واصابع البطاطس الي مبينه من جوانب الساندوتش واهي بالكاد مسيطره على الوضع قضمت قطعه من الساندوتش واهي تقترب من اختها الي كشرت بقرف واهي تشوف وسن كيف تمط كل فمها على اوسع شي علشان تقدر تقظم الساندوتش تكلمت بتقزز من منظرها : حشوه ذي والاحمل بتوائم !
وسن اخذت وقت علشان تقدر تبلع الاكل المحشور في فمها وترد : كلمتي غزل
همس عقدت حواجبها بغضب : تراك اقرفتيني بالسالفه ذي كلمتها الظهر وانتهينا والاتحلمين اكلمها مره ثانيه
وسن بقهر : هي مزيونه صدق والابس تقوله علشان تقهرني
همس اظربت الطاوله بيدها بقهر : انا عندي مذاكره ماني فاظيه لغرامياتك وكل الكلام الي عندي قيدني قلته لك وهالحين حلي عني قبل اروح لأبوي واعلمه بهبالك كله ......واصلا يوسف مطلقك بعد ماسفل فيك وسقاك المر يعني بالعربي لايحبك والايبيك استوعبي هالمعلومه وتلاحقي الي بقى من كرامتك
غمضت عيونها بقهر واهي تحس بكلام اختها سكاكين تطعن في قلبها انطقت بصرخه مكبوته تهرب من لوم اختها : خلاص ذاكري دروسك مابي اسمع شي
استدارت طالعه من عند همس واهي تقظم قطعه كبيره من الساندوتش تقطعها باسنانها بحقد وفي نفس الوقت تفكر
انا لازم اشوفها وش الي عجب يوسف فيها وش زودها عني بس كيف اروح اهناك كيف ....هين يايوسف ان ماحرمتك منها زي ماحرمتني من نفسك ومن حبك وقربك ان ماحرقت قلبك زي ماحرقت قلبي ...تذكرت شي واسرعت لغرفتها فكت وحده من ايدينها عن الساندوتش العملاق الي كانت خانقته بين اكفوفها وانهلت نصف الحشوه على الارض
عضت شفتها متذمره من الحوسه الي صارت وفي نفس الوقت مدت يدها بسرعه تفتح الباب حتى ترجع تمسك الساندوتش قبل يمطر ماتبقى منه على الارض دفت الباب برجلها لحد مانفتح على وسعه ونزلت نظرها للحشوه الناجيه بجانب الباب
فكرة هل تلمها او تخليها مكانها ناظرة في ايدينها فشافت انها كلها مشغوله بتقييد ماتبقى من معتقلين متعددي النكهات مابين ضفتي الخبز
دخلت متجاوزه الباب متناسيه امر الدجاج والبطاط وماامتزج بينهم مرمي في الارض
اوصلت للطاوله الموجوده في صالة الجلوس الصغيره الموجوده في جناحها نزلت الساندوتش
عليها باهمال واسحبت مناديل من العلبه الموجوده على نفس الطاوله امسحت ايدينها بالمناديل ورمتها في السله وارجعت للباب تقفله
وهنا بدى الحماس يشتعل في اطرافها فدخلت لغرفة النوم راكضه اتجة للسرير وبدت ترفع مفرش السرير مبعدته عن المرتبه الي تحته وبدت ترفع المرتبه الثقيله من عند نهاية السرير اول مانكشف لها الجزء السفلي من المرتبه مدت يدها لسحاب
بيت المرتبه وافتحته ودخلت يدها لداخله واسحبت كيس ورقي بني متوسط الحجم ابتسمت بانتصار واتركت المرتبه تسقط راجعه لمكانها على السرير وانقزت هي جالسه على السرير تربعت
واقلبت الكيس ناثره محتوياته قدامها واهي تتوعد في يوسف وزوجته : اذا ماكنت لي يايوسف ماراح اخليك لغيري !!
_______________
واقفه قدام التسريحه لابسه ملابس رياضه مريحه
تتمنى لوتقدر تتريض بلبس الرياضه الحاله نفس ماتسوي في بيتهم بس اكيد هالشي راح يبقى مجرد امنيه لان وجود نادر وعمه يلزمها انها تلبس عباتها
البست عبايتها واحكمت لف الطرحه على راسها البست النقاب وانزلت من بعد هوشت البارح ماشافت منهم احد نادوها للعشى واعتذرت عنه .....ماتدري اذا كانو ماخذين منها موقف اولا لكن الأكيد انها ماراح تتنازل عن حقوقها لمجرد انها ترظيهم انزلت تحت والاشافت احد شكلهم ارجعو ينامون بعد الصلاه اتجهة للممشى مباشره وبدت تمشي وترتب افكارها الجناح الي هي فيه محيرها تجهيزه يقول انه جهز لعرسان ......بلاش عرسان .....كلهم عندهم اجنحتهم الخاصه البنات لهم جناح مشترك يوسف له جناح خاص الجناح الرئيسي لام نادر وابونادر ثائر والجد لهم جناح مشترك تحت نادر وجواد لهم جناح مشترك خارج الفيلا بجنب جناح الضيافه اذا كل واحد له مكانه وش عازة ذاك الجناح ؟! هل انهم مجهزينه لزواج احد العيال ؟طيب مين الي جهزوله الجناح والاتزوج؟! غزل قالت لاتسئليني عن مصايب يوسف وانا كنت اسئلها عن الجناح وامنه قالت بقولك قصة الجناح لانك زوجت يوسف ! معناته الجناح ليوسف طيب ليه يجهزون ليوسف جناح عرسان ؟
اكيد انه كان خاطب احد ...اها موب غزل قالت انهم رافضين يخطبون له كيف رافضين يزوجونه وفي نفس الوقت مجهزين له جناح ....طيب يمكن خطب وفك الخطبه وهذا الي خلاهم يرفضون يخطبون له مره ثانيه طيب ......: بسم الله من وين طلعت
ابتسم الواقف قدامها بملابس رياضه وواضح انه جاي يمشي : من جناحي اكيد وش مطلعك صباح الله خير
تجاوزته مكمله مشي ومشى معها موازي لها وتفصلهم مسافه كافيه ردت : متعوده امشي هالوقت
جواد : حلو لقيتلي مرافق في رياضتي الصباحيه
بروق كشرت فهذا اخر واحد تتمنى انها ترافقه
كملت مشي من غير ماترد عليه
جواد : رجلك باقي مارجع من سهرته الصباحي
بروق بحنق : اعتقد انك متعود انه مايرجع هالوقت
فلاتتكلم وكأن الموضوع جديد عليك
جواد بقرف : لاماهو جديد علي بس جديد عليك انتي عروس مالك ثلاثه ايام متزوجه ورجلك يسهر الليل بطوله برا واذا رجع انخمد النهار بطوله
بروق تنرفزت منه : جواد ممكن تتوقف عن بث طاقتك السلبيه في الي حولك ثم انا هنا جايه امشي بصمت !
جواد ابتسم بانتصار بعد ماشاف كيف عصبت اكتفى انه يتقدم عنها في هروله خفيفه ....
بروق ارتاحت انه تقدم عنها وافتكت منه كملت مشي ........اخذت كم لفه على الممشى وادخلت
للفيلا وجواد مازال مستمر ......اصعدت لغرفتها استحمت والبست بنطلون وبلوزه تركت شعرها ينشف براحته من غير استشوار .......راحت لصالة
جناحها رمت نفسها على الكنب المنفرد وبدت تكلم امها وابوها تصبح عليهم خلصت مكالمات
البست عباتها من جديد وانزلت ... اليوم الاحد
واكيد ان الجميع بيكونون على طاولت الطعام
الحين علشان دواماتهم اوصلت تحت وفعلا شافتهم مجتمعين بما فيهم جواد الي مازال بملابس الرياضه اخذت نظره بانوراميه سريعه
عليهم وشافت انه غرور ماهي موجوده واكيد يوسف : صباح الخير
صباح النور
هلا هلا بخويتي الي خلتني
ابتسمت بروق واهي تلتفت على الجد : جدي انا ماتركتك قايله لك من امس حصة الرياضه بعد صلاة الفجر وانا نزلت بعد صلاة الفجر شف عاد مين الي كسل ونام وخلى خويه
الجد ضحك : ههه صادقه انا الي خليت خويتي
انا امشي بس عاد ممشى بعد صلاة الفجر مالي شده عليه
جواد يبتسم لابوه : خلاص راحت عليك صارت خويتي انا
بروق بمزح : والله شكلي بقدم رياضتي قبل صلاة الفجر علشان افتك من خوتك
جواد التفت عليها واهو يبالغ في رسم علامات الصدمه على وجهه والموجودين اضحكو على حركته : افا
ثائر يسوي يده على شكل مسدس ويمثل انه اطلق
رصاصه على جبهة عمه : في منتصف الجبهه
جواد يناظره بتكشيره : بتجيك الملعقه الحين في منتصف العين
ثائر بروقان خم عينه بيده وكانه احذفه صدق : اخ عيني يامجرم
بروق اضحكت واهي تأشر لثائر : هههه شفها طاحت في صحن الزيتون
ثائر بعبط قام يفتش باصبعه بين حبات الزيتون : ماشاء الله من قو سوادها وزينها عجزت افرق بينها وبين حبات الزيتون
نادر : امفارقها الزين
في هالوقت دخل عليهم يوسف شعره مبعثر ووجهه
مرهق وباين عليه التعب جاء يمهم سحب اقرب كرسي يمه وجلس عليه من غير سلام كالعاده
الصمت خيم على الموجودين والنظرات بدت تتجه لبروق الي حست بأهانه توه راجع من سهرته والكل عارف ان هالسهره لاتخلو من خيانته لها
يوسف يناظر فيها ببرود ومافاته نظرات الاحتقار الي ترميه فيها تكلم عادي : انتي ثانويه والاجامعه
بروق رغم غيضها منه ردت بشكل عادي : لاثانوي والاجامعه
غزل الي من عادتها انها تكون خامله الصباح وهذا هو الوقت الوحيد الي يرتاحون فيه من السانها
التفتت على بروق الجالسه جنبها على يمينها
وبدهشه منفعله : ماتدرسين
بروق لفت عليها واهي تميل بضهرها ورى وكأنها
متخرعه : يمه اشتغل الكهرب فجأه
كلهم ضحكو على تعليقها
:ههههههههههههههه
ابتسم يوسف ابتسامه كسوله وبان جماله اكثر وانقهرت بروق وصدت عنه تحس انها تناظر بنت
رغم ان العوائق بينها وبينه لاتعد والاتحصى الاانها
تعتبر هالوجه نصفها
ام نادر اسئلتها باستغراب : ليه ماتدرسين
بروق تذكرة السبب الي اجبرها على تأجيل الدراسه
السنه ذي ردت بشكل عادي : مخلصه الثانويه واجلت الدراسه السنه ذي السنه الجايه ان شاء الله راح اكمل
يوسف ماعجبه انها مأجله الدراسه تكلم بانفعال واهو عاقد حواجبه : وليه تضيعين سنه على الفاضي
بروق ابتسمت وارحمته لانه مكشوف لها بالكامل وتقدر تطعنه بالسكين الي تبي وفي المكان الي تبي بس رحمتها له ماوصلت لدرجة انها ترد عليه من غير تجريح
: موب انا الي تهدر وقتها على الفاضي انا قاعده ادرس اللغه اليابانه عن بعد وانسق مواعيد محاضرات ماما الدور والباقي على الي مضيع كل شي في حياته وعايش كأدات هدم للمجتمع
يوسف وصل عندها في لحظه وحده ومسكها بفكها وصرخ بغيض: انتي واخرتها معك
بروق شافت اثر بوسه على ارقبته وحامت عليها كبدها اكيد الحين جاي على جنابه احساس مقرف
حست فيه ومن غير تردد دفت يده عنها بقرف واهي تحس بغثيان سدت فمها بيدها واهي تدفه
عنها : بعد عني اقرفتني وبصرخه ...بعد
وقامت تركض للمغاسل واهي تحس كبدها بتطلع
مع حلقها من قو الغثيان اوصلت للمغاسل القريبه
منهم وبدت تستفرغ كانو يشوفونها من مكانهم واهي معطيتهم ظهرها ومنحنيه على المغسله وصوت استفراغها واصل لعندهم واهي تتخيل
كم وحده عرفها كم وحده نام معها تحسه كتلة وصخ يمشي على الارض....اهي كاس الماء لاسبقها عليه احد تعافه وشلون كاس مر على الف مخلوق قبلها ...ماتتخيل كمية القذاره المتجمعه فيه . ...اول ماحط يده على فكها من فوق النقاب حست انها تشم ريحة جيفه من يده رغم انه قبل يقوم من مكانه كان عطره واصل لحد عندها..احساس الإشمئزاز والتقزز وصل لاعماقها وقاعد يقلب معدتها مثل المغرفه في قاع القدر ..اعتصرت بطنها بيدها واهي تهوع بشده وتحس بمرارة عصارة المعده واهي تنزل من فمها ... .....تحس ان القذاره متجمعه طبقات على جسمه ...تتخيله مكتسي بمزيج عفن مستخلص من قاع برميل الزباله شي مقرف من قلب ماتقدر تتحمله..... انسان منحط مافي جسمه مكان الاسبق والمسته حرمه غيرها مافيه كلام ممكن يقوله او حتى يخترعه الاوسبق وقاله لعشرات غيرها ...يعني شخص مستهلك بكل المقاييس واهي انسانه عزيزه تعاف نفسها الي في يد غيرها ...........
الي على الطاوله مازالو مذهولين من الي صار وارحمو يوسف لدرجة ان جواد اكثر واحد يتشمت فيه ويفرح بأهانته صد عنه وسوى انه ماشاف شي
يوسف متسمر مكانه مذهول اول مره في حياته تقرف منه بنت تعود ان البنات يفرحون بنظره من عينه وحظنه عندهم يوم عيد حس بأهانه وقهر ماعمره حس بمثله احتار وش يسوي معها ......معقوله قرفانه منه بجد ؟! طيب ليه ؟! هو صحيح ماتروش بعد السهره بس حتى ولو ماهو بوصخ هو مغسل ومتعطر ... معقوله حست بالي قاعد يصير من وراها والا هي حاكمه عليه خالصه
انه يخونها لمجرد انه يسهر الليل كله برا ...........طيب ليه وافقت عليه !! اهو اصلا ماكان متوقع انها بتوافق بعد الي صار في البر بس دامها وافقت ليه ماهي متقبلته ليه نافره منه ليه .؟! الكلمه الاخيره اعلقت في خياله ماقدر يتجرع المها ! ...........
بروق تحس خلاص بتموت بطنها فضى واهي باقي
تهوع وزعت الماء بيدها داخل الغساله تنظفها ثم رشت على يدها رشه من ماء الورد المحطوط في بخاخ على المغسله وحطت يدها على انفها تحاول تهدي الغثيان ...اشوي اشوي بدت
تهدا سكرت المويه واستدارت ماشيه في اتجاههم مرت من عندهم وتجاوزتهم للدرج من غير ماتناظر فيهم يوسف مازال واقف مكانه يتابعها بنظراته
والصدمه مازالت شاله حركته يحس انه تيبس مكانه ....
______________
*
*
*
الشاب وصل عندها وسئل باستغراب ونبرة تعالي :من انتي ؟!
بروق شملته بنظرة تقييمية طويل قمحي يميل للنحف فيه شبه كبير من ابونادر وابوجابر اكبر من نادر واذا اخذت بعين الاعتبار ان الأب يكنى باكبر اعياله فهذا يعني انه ماهو من عيال ابونادر غير ان عيال ابو نادر كلهم فيهم لمحه من امهم باستثناء يوسف الي وجهه كله لامه ومافيه اي شبه لابوه كل ذا ادركته في اللحظه الاولى من وقوف الشاب قدامها
نبرته المتعاليه ماعجبتها وحست انه خرب جوها تكلمت وقصدها تغثه زي ماغثها : انا من بشاير المطر ...
الشاب حس انها تستظرف نفسها رد بسخريه واهو فاهم ان اسمها له علاقه بالمطر بس ماقدر يخمنه برق ورعد كلها ذكوريه : شايفتني بدوي كاشت ؟
بروق باستفزاز لانه مازال يتكلم معها بشوفة نفس
: بدوي كاشت احسن من بليد مايعرف وشهي بشاير المطر على بساطتها !
الشاب تنرفز ورد عليها بنفزه : العب معك فوازير انا تكلمي عدل اشوف... من انتي ووش جايبك هنا واذا من صديقات البنات عز الله لاقطع رجلك من هالبيت ..
بروق ردت بغيض من جاء واهو يكلمها من طرف خشمه وكأنها شي تافه قدامه : للاسف ماتقدر تقطع رجلي لاني من اهل البيت عاد شف ليه محد قالك ...واضح انك فرد مهمش ؟!
الشاب عصب منها وفي نفس الوقت اشغله كلامها وبتفكير سريع مستحيل تكون من اهل البيت الا اذا ؟!صرخ عليها
: مستحيل نادر يتزوج بالسرعه ذي ومن غير مايقولي ...
بروق ببرود واهي مبسوطه انها اقدرت تثير اعصابه : اتفق معك بالنسبه لشخص تقليدي مثل نادر يبيله اقل شي ست شهور علشان يتخذ قرار الزواج ويخطط لزواجه وماهو مخلي احد ماعزمه على عرسه
الشاب وصل اعلى مستويات الاستفزاز من المعنى الي وصله : اصلا مانتي كفو تاخذين نادر حدك الي ماهو تقليدي بفجوره يوسف الوصخ
بروق بحده : يوسف وش ماكان وصفه عندك فهو ينتميلك ويشاركك نفس الاسم ونفس النسب واذا لابد واحد منا ينتقص الثاني لسبب قرابته من يوسف فالاكيد اني راح اكون صاحبة هذا الحق
الشاب بعصبيه : لاطبعا مايحقلك انا قرابتي فيه انفرضت علي غصب وانتي تزوجتيه برضاك
قاله واهو يشملها بنظرة احتقار سكت للحظه وكمل بصيغة استخفاف وكراهيه للي تجلس
قدامه بكل اريحيه وكأنها عايشه في هالبيت من اسنين : واضح انك ماخذتي في يده ساعه !.......وحده تافهه مثلك بس تشوف واحد مزيون تدلع فمها قدامه وترمي نفسها تحت ارجوله
بروق عصبت من كلامه فزة واقفه وصرخت عليه: التافه هوالي يبني احكامه جزافا واهو مايدري عن شي وماهو انا الي ترمي نفسها لأحد فالتزم حدودك قبل لاتتحاسب على كل حرف تتلفظ فيه
توسعت عيونه من اهياطها ومن هي بس علشان ترفع صوتها عليه صرخ بصوت اعلى : ومن انتي علشان تحاسبيني على ............قطع كلامه بسب
الي اندفعت مثل الطلقه بينه وبين الطاوله
الي تجلس عليها بروق
غزل واهي تدفه بكل ايدينها :عمي ستوب ستوب
لاتتهور انا متاكده انك فاهم غلط
وقبل لاتعطيه فرصه يرد التفتت على بروق بعصبيه واهي تغرس ايدينها في وسطها : وانتي تمشين وتهاوشين مع الخلق بعدين وشلون تطلعين للحديقه من غير ماتقولين لي وانا من اليوم رايحه جايه قدام جناحك احتريك تطلعين وشفقانه عليك من الازعاج اقول اخاف اطق عليها تكون نايمه والاشي
عمها لفها له بغيض من هذرتها : منهي ذي ووش جايبها هنا
غزل باستعباط ماهو محله قربت منه تسلم وتبوس اخدوده :عمي حبيبي متى جيت
انقهر منها نفضها بعضدها : ردي علي مثل الناس لاالفعك
غزل توهقت خايفه يهب في وجه بروق لاعرف انها زوجة يوسف يكفي انها جت واهم يتهاوشون وماتدري وش سبب الهوشه قطع تفكيرها نفظت
عمها لها مره ثانيه : انطقي اشوف
غزل بعصبيه : هذي بروق زوجت يوسف والاتفكر حتى انك تزعلها لان ابوي حاطها في حمايته وفي وجهه ولو عرف بس انك رفعت صوتك عليها بيغسل اشراعك
عقد حواجبه بعدم فهم زوجة اولده وش داعي انها تكون تحت حمايته وفي وجهه وش لازمة هالكلام الكبير ذا .......
بروق ارجعت تجلس رغم غضبها بس ماتبيه يحس وكأنه انتصر عليها بقذارت السانه بدت تتفرج عليهم وتشرب شاهي بغيض لمتى واهله يحاسبونها على اخلاقه وافعاله المفروض انها هي الي تحاسبهم لانهم هم اهله هم الي صنعوه
غزل تحاول تهدي الوضع : بروق هذا عمي جواد هو ونادر عايشين في نفس الجناح
ماشافت تفاعل من بروق التفتت على جواد
: عمي هذي بروق بنت جاسر الماجد
جواد توسعت عيونه بدهشه جاسر الماجد مزوج بنته ليوسف !! غريبه كيف واحد بمكانته يعطي بنته لواحد لااخلاق والادين الا اذا يوسف لاعب عليهم اويمكن مغتصب البنت اوهي وصخه ومخاويته رفع انظره لها للحظه مايدري ليه موبالع سالفت انها وحده داشره وحتى يتخلص من هالحيره سحب واحد من الكراسي وجلس وغزل بعد اجلست واخذت الزمزميه تصب لعمها ولها شاهي جواد رفع انظره لبروق وبهدؤ يناقض هيجان افكاره الداخليه : وش السالفه
بروق بحده بسب قذفه لها من اشوي : اي سالفه
جواد بتصبر : سالفة زواجك من يوسف ووش الي يخلي اخوي يحطك في وجهه دامك زوجة اولده
وصرتي وحده من اهل البيت يعني شي طبيعي لك مثل الي لغيرك من اهل البيت من حقوق وواجبات واحترام
بروق بتهكم: اهااااا تعرف الاحترام طيب والي من اشوي كان يقذفني رغم ان اول شي خبرته فيه اهوا اني من اهل البيت وش وضعه بالضبط !
جواد زم شفايفه بغيض يحاول يكبت غضبه بالقوه
ومَراده عنها الا كلام غزل الي عجز يفسره وحاس ان الموضوع فيه سالفه كبيره فجأه تذكر الشخص الي ممكن يخبره بالسالفه من غير مايضطر لمقابل
هالبروق ......بروق !! وع وش ذا الاسم
: ماقذفتك بس انتي الي جايبه لنفسك الشبهه بذا الزواج
بروق ارمته بنظرة احتقار وبغيض: انا فوق كل الشبهات واذا ولدكم منحط انتم الي تلحقكم الشبهه ماهو انا
تجاهل كلام بروق مايبي يازم الوضع اكثر واهو مايدري وش السالفه خاصه بعد ماعرف بنت من التفت على غزل : غرور وينها
غزل تاشر باصبعها لفوق : في غرفتها
جواد : وامك
غزل : امي وابوي ونادر وجدي راحو كلهم لاهل بروق
توسعت عيونه باستغراب هو داق على نادر وقايله
انهم عند رجال وسكر بسرعه بس سالفت انهم كلهم
عند اهلها ليه وش يسوون اهناك : وليه رايحين لهم
غزل خافت تجيب طاري الحفله يفتح تحقيق جديد
قالت بتهرب : مدري عنهم
جواد لاحظ انها تتهرب من الرد فضل يروح لغرور ويفهم منها السالفه يمكن غزل ماتقدر تتكلم قدام البنت قام واقف : انا رايح لغرور
اول ماراح تاركهن انقزت غزل جنب بروق وامسكتها بيدها : بروق تكفين لاتزعلين من عمي هو كذا يكره
طاري يوسف واي شخص يصف مع يوسف
بروق بغيض : كرهه ليوسف مايعطيه الحق بالتطاول علي بس علشان تزوجت يوسف
غزل باسف : ادري والله ادري بس انتي ماتعرفين شي عن المصايب الي سواها يوسف وانا متاكده ان عصبية عمي اغلبها من خوفه عليك وانتي شفتي بعينك كيف اهلي كلهم رافضين يزوجونه علشان مايحطون ذنب البنت الي يتزوجها برقبتهم ولولا الفلم الي سواه علشان يتزوجك والاكان محد عطاه وجه
بروق عقدت حواجبها بتفكير وش مهبب هاليوسف
وبتحقيق : وش سواء يوسف علشان يخافون على البنت الي يتزوجها ؟
غزل انبهتت كله والاهالموضوع اهي ماصدقت تتخلص من كوابيسه وللحين تخاف تقعد مع يوسف الحالها بسببه مستحيل تفتح هالسيره الي تسود الوجه تكلمت بعصبيه غير مبرره بالنسبه لبروق
: قلتلك من البدايه لاتسئليني عن مصايب يوسف
روحي اسئليه انا مالي شغل في هالسوالف خل اروح اذاكر اصرفلي
وقامت من عند بروق متجهه لداخل بخطوات سريعه غاضبه
_________
في غرفة غرور
جواد باستغراب : هي الي قالت لكم هالكلام
غرور : لايوسف هو الي قال لاهلي وانا علمتني غزل
جواد بقهر : معناته البنت واهلها انخدعو بيوسف وماكانو يعرفون عنه شي ويمكن يوم قال لهم اسم العائله اعتمدو على سمعتنا الي تصدح في البلد كله والانشدو
غرور : اتوقع والاليش تحتمي بابوي وتطلب لها جناح الحالها
جواد حس بالحرج من بروق وتعامله معها : المشكله انا جبت العيد معها واذا تبين الصدق حتى بعد كل الي عرفته ماني قادر اتقبلها احس انها شايفه نفسها ومتكبره
غرور اضحكت : ههههههه حرام عليك بالعكس البنت طيوبه وتجنن وترا ثائر سفل فيها قبلك ومشتها له علشان جدي قال امسحيها في وجهي
قامت سكرت كل الموضوع بمافيه كلام ثائر
جواد رفع حاجبه باستغراب : حتى ولو ماهي نازله من هنا
قاله واهو يأشر على حلقه
غرور ببرود : كيفك بس اعتذر منها قبل يجي ابوي وجدي ترا بيزعلون اذا عرفو انك مزعلها
جواد نفخ بضيق : اف لاتقولين ابوي حبها
غرور بتأكيد : مسوي معها رياضه الصبح وطول الظهر مدوشنا بمدحها
____________
في غرفة خزام
هزاع باستنكار : ياخي انت مجنون تحب وحده بس علشان لقيت شعرها مقصوص وفديو مسجل واهي تبكي وتشكى لابوها
خزام : عاد هذا الي صار ماهو في يدي ياهزاع من سمعت صوتها واهي تبكي وترجي ابوها انه يتم يفتخر فيها مهما صار عليها لانها مستحيل تخونه وان صار لها شي بيكون غصب عنها احس بحرقه في قلبي ودي اعرف وش صار عليها
هزاع : هو...هو علينا ماتدري يمكن تفلم على راسك
خزام تكلم بحرقه : هزاع لاتستخف فيني ماني غبي
اصدق اي شي وانا متاكد انها كانت صادقه في كل كلمه قالتها
هزاع : طيب ورني الفديو حقها بسمع بنفسي ياخي ابي اي شي يقنعني
خزام بغيره : تحلم اسمعك صوتها لو تموت ماخليتك تسمعه
هزاع يتربع على السرير : ياسلام يعني انت تسمع البنت وسوالفها وانا توريني القرود اهلها وش اسوي فيهم
خزام بحده وجديه: هزاع الزم حدك عاد قلتلك بدورها لين القاها واتزوجها واهلها كلهم مزاين وين القرود في الموضوع
هزاع : وانت ماتبيني اسمع وش قالت بس علشانك بتتزوجها ترا بجي اتكي عندك انت وياها وبتقهويني اخت مشاري واسولف معها وجها لوجه وقدامك
خزام : تخسي ان شفتك متعدي قسم الرجال حشيت ارجولك
هزاع يتصنع الزعل : هذا وانت ماتزوجتها بعتني
خزام زهق من اهبال هزاع : خل عنك السماجه وقلي الحين كيف القاها
هزاع شاف حال خويه مايسر وبجديه : اسمع ابوها وجهه ماهو غريب كني قيد شفته
خزام : حتى انا احس اني اعرفه اتوقع قيد شفتله
صور بس وين وين مااتذكر
هزاع : المشكله ماقالو اسمه
خزام : وش رايك نسوي بحث عن اسم مشاري يمكن نلقاله احساب في الانستقرام اوتويتر
هزاع طلع جواله وفتح على الانستقرام وبدى يبحث
: انت ابحث في تويتر
بعد فتره زفر خزام بضيق : اف لقيت شي
هزاع : ياكثر الي اساميهم مشاري بس والاواحد له نفس الصوره وباقي كثير مالحقت اشوفهم وانت
خزام بطفش : نفس الشي والحل الحين
هزاع : وش رايك نعلم عروب يمكن تقدر تساعدنا
خزام : وكيف بتساعدنا عروب
هزاع : يمكن تكون البنت معها في الجامعه
خزام : وافرض كيف بتعرفها حنا مانعرف الا ان اسمها بروق واخوانها رعد ومشاري وعمها صقر وكم واحد من اعيال عمانها وابوها وعمامها مانعرف اساميهم
هزاع : لو البنت معهم بتنتشر سالفتها في الجامعه
ماهو كل يوم تضيع بنت من اهلها
خزام : لوهي سامعه سالفه زي كذا علمتنا
هزاع : ماتدري يمكن تسمع والاتقول لاحد
خزام : لا بلاش عروب اخاف تعلم الهبله سحر ثم تصير سيرتنا على كل السان
هزاع : اف اجل كيف بندورها
خزام : مدري انا كل يوم اطلع الف في الشوارع والاسواق لعل اشوف احد منهم
هزاع : خاين من جد وصارلي اسبوع انشدك وين تطس وين تروح ومخبي علي
خزام : غصب عني انا لحد الحين ماني مستوعب الي صار
هزاع : وعمتي وريتها الصور والفديو
خزام : لا هي سحبت الكلام مني بس ماعلمتها بالسالفه كامله كل الي تعرفه اني احب وحده اسمها بروق .... على طاري عمتك تراها تقول عروب زعلانه علينا وتبينا نمرها ناخذها نمشيها
هزاع : تكفى لاتقول ازعلت علشان نزلت سحر في بيت ابوها البارح
خزام : الا اصلا عروب بعمرها مازعلت علينا الاعلشان ذالعله
هزاع : ترا سحر طول عمرها لاصقه في بيتكم ولكنت تتكلم وش الي جد
خزام : الي جد ان خالي لمحلي انها تخطب ومدري ايش وكانه يبيني اخطبها غير الشباب ذاك اليوم يقطون كلام متى بتخطب وشكل امك حاطه عينها على ناس اربعه وعشرين ساعه مسنترين عندها يعني العالم ملاحظين انها دايم عندنا
وصارو يحشروني في السالفه غصب
هزاع حك راسه عاد لو اقولك قبل كم يوم لمى دخلت على خواتي وش سمعتهم يتكلمون فيه ....
: ترا سمعت طراطيش كلام ان سحر تحبك
خزام توسعت عيونه : نعم ...ومن قال هالكلام
هزاع : انت ماعليك من الي قاله المهم انها سالفه متداوله
خزام : هذا الي كان ناقصني على كذا لازم اكلم عروب تبعدها عن طريقي
هزاع : اقول قم خل نروح نشوف ذا الدلوعه وش مزعلها وتراك من جد مدلعها
خزام : تستاهل الدلع عروبه
_____________
في الكوفي
عذبه لابسه بنطلون جنز وبلوزه قطن ثقيل طويله
وجاكيت جنز طولها متوسط جسمها مليان في اتزان انيق شعرها متوسط الكثافه والطول جمالها ناعم هادي جذاب بغموض الي يجلس معها تتكون عنده رغبه في تأمل وجهها من غير ماتكون عنده فكره واضحه ايش الي شده في وجهها بضبط
باختصار هي تجسيد حي لأسمها عذبه
توها اطلعت من المطبخ الملحق بالكوفي بعد ماشرفت على تتغيير زيت القلي في القلايات
الي يقلون فيها الدونات ..... حريصه في شغلها وتحب تشرف على كل شي بنفسها
اوقفت امام كاونتر تسجيل الطلبات تاخذ طلبات الزباين واهي ترمق عروب بطرف عينها
دونت طلب الزبونه وانقلته للعامله المسؤله عن تجهيز الطلبات مرت على عروب وسحر الي حاطات روسهن في بعض ويسولفن امسكت الثنتين باذانيهن تفركها بلطف : وانتن عبء على العمل مامنكن فايده
سحر خمت اذنها بسرعه وبتبرير : اي عمه لاتشمليني مع اختك الكسوله انا من اليوم اشتغل هي الي جتني وعطلتني
عروب ماهتمت بفركة عذبه لاذنها الي اساسا خفيفه ومسويه زعلانه زمت شفايفها واهي تطالع
عذبه بنص عين : اشوف ولدك ماجاء وين الي قلتي بيطلعني والاتلعبين علي انتي وياه بزر عندكم توعدوني لين اسكت وتسحبون علي
عذبه امسكت راسها بيدينها الثنتين بحركة تهويل
: الله الله ياكبرها ياعروبه وانا وولدي متى ردينالك طلب والامتى لعبنا عليك
عروب تورطت هي تبي تتزيعل وتخلي عذبه تراضيها بس انها تسئلها مثل هالسؤال مافيها تجاوب لانهم مطيرينها للسماء ولو امها وابوها حيين ماعاشت معهم ربع النعيم الي عاشته مع عذبه وخزام خاصه من ناحية المحبه والدلال
في النهايه ماقدرت تعترف بالحق حورة السالفه
وارفعت يدها قدام وجه عذبه بزعل : هه شوفي الساعه كم وينه خزاموه ماجاء
عذبه امسكت كفها تربت عليه : ماعليه انتظري شوي تراه قايل بعد صلاة المغرب على طول بيجي والصلاه باقي عليها وقت
عروب ابتسمت بدلع : واخذ سحر معي
عذبه بحزم : لا
سحر انخطف لونها بفشله
وعروب انفخت : اذا سحر ماراحت معي ماني برايحه
عذبه توهقت فيها : عروب سحر مايصير تطلع معك
لاتنسين انك طول الوقت مع خزام وهزاع
سحر بزعل : اصلا انا ماابغى اروح
عذبه امسكتها بيدها : سحر انا اقول هالكلام علشانك انتي مايصير تطلعين في سياره كلها شباب مانهم محارم لك
عروب باصرار : انا معها ماراحت الحالها
عذبه باصرار اكبر : لوكانت بنتي ماسمحت لها تطلع مثل هالطلعه حتى لوانتي معها واهي بنت اخوي يعني بنتي انا بعد ومافيه روحه بتروحين معهم الحالك والااقعدي تبغين سحر معك اطلعن تعشن في المطاعم الي في ذا المجمع بالمره اذا احتجتكن تكونن قريبات
سحر ازعلت من قلب واحقدت على عمتها ليه تحرمها من فرصه مثل هذي بتكون فيها قريبه من خزام : انا محمد كلمني وبيجي ياخذني الحين
قالته واستدارت داخله لغرفة عمتها الخاصه تتصل
باخوها محمد علشان يجي ياخذها
عروب عصبت : شفتي زعلتيها
عذبه بجديه : عروب لاتخلين حبك لسحر يضرها انتي خالت خزام وعمة هزاع محد يقدر يقول فيك شي لارحتي معهم بس سحر غير واحد ولد عمتها وواحد ولد عمها وش تبين الناس يقولون عنها واهي رايحه جايه معهم في كل مشاويرهم عيب مايصير
عروب بمنافخ : قطع السان الي يجيب طاريها بحرف اصلا كلهم يعرفون انها ماتطلع الامعي
عذبه ازفرة بنفاد صبر :اف عروب باختصار سالم كلمني يقول اذا خزام يبي البنت يخطبها رسمي
والالايشيلها معه في سيارته ويجيبلها الكلام
عروب ابتسمت بفرح : عز الطلب يالله نخطبها لخزام
عذبه توسعت عيونها بتعجب من اختها : وش قالولك خزام بزر اجره بيده واخطبله الي ابي
خزام مايبغاها
عروب بالحاح : مهوب على كيفه قولي انك ماتبين احد غيرها
عذبه بجديه واهي تنطق كل كلمه الحالها لعل هالعروب تستوعب : الا على كيفه وماراح اخطبله الاالي هو يختارها بنفسه وسحر اولا ماتناسبه ثانيا هو مايبيها ثالثا انا ماازوج اولدي وحده تخلت عن ادراستها ومستقبلها علشان كلمه اسمعتها من واحد ترسم عليه وماتدري اذا هو يبيها او لا
قالته واتركت عروب راجعه لزباين وطلباتهم
اما عروب انذهلت بكل مالذهول من معنى ماتوقعت ان عذبه تعرف عن كل شي كانت تظنها على نياتها وماتنتبه !!
____________
بيت ال عامر بعد المغرب وقت اجتماع العائله اليومي
كلهم موجودين في الصاله ماعدا ثائر طالع مع اصحابه ويوسف باقي مانزل وهذا هو الوقت الي متعود يصحى فيه
العاملات ادخلو بصواني القهوه والشاهي والحلا للقهوه والمعجنات للشاهي صفو الصواني على الطاوله واطلعو في نفس الوقت ادخلت بروق
: السلام عليكم
وعليكم السلام رد جماعي باصوات متفاوته
بدو يصبون القهوه ويتقهوون
ابوجابر : ابوك يسلم عليك يابروق
بروق : الله يسلمه يارب حياتي انا وشلونه
ابونادر بمزح : مابه الا العافيه ازعجنا بين كل كلمه والثانيه يسئل وشلون بروق
بروق تضحك : هههههه بعد عمري والله ابوي لحد الحين ماهو مستوعب اني رجعت له
ابوجابر : الله يخليه لك ويخليك له
بروق : اللهم امين ويخليلكم احبابكم يارب
امين
ام نادر : ماشاء الله على امك الجلسه معها ماتنمل
بروق التفتت على خالتها واهي تبتسم من تحت النقاب : ياجعلني فدوه لها امي انسانه اجتماعيه وتحب تتعرف على ناس جدد
غزل بحماس : انا شفت محاظره لها عن الوقت وتنظيمه شكلها في البيت ممشيتكم على المسطره
بروق بضحكه : ههههه موب لذي الدرجه كل شخص عنده المسطره الي تناسبه .....
ارفعت فنجانها لفمها ترشف منه ثم ابعدته عن فمها محتفظه فيه بيدها حست
بريحة الدخان الي انتشرة في الجلسه فجأه التفت لمصدر الريحه وشافت يوسف يدخل لصاله بكل برود لابس جنز وقميص ابيض وفوقه جاكيت وشعره سايح ومبعثربعكس كل المرات الي شافته فيها كان دايم يسويه سبايكي مافاتها نظرة الاحتقار والكراهيه المتبادله بينه وبين جواد تقدم للكنبه المنفرده على يمينها وجلس من غير لايرد السلام الحركه الي خلتها تحس بالإهانه الي زاحمت خليط من المشاعر تجاهه احساس بالشفقه عليه وعلى حالة الضياع الي يعيشه احساس بالا حتقار له ولدنائته احساس بالأشمئزاز من المعلم الانثوي المتصدر لشكله الخارجي ....... انسدل شعره على وجهه الجميل ووصلت بروق لاقصى درجات الاشتعال لمى رفع يده يبعد شعره عن عينه بحركه عفويه نزلت فنجان القهوه الي في يدها على الطاوله بغيض واهي تحاول تسيطر على اعصابها لكن هالمحاوله تبددت لمى رفع راسه ناحيتها على صوت الفنجان المرتطم بالطاوله بطقه مسموعه وشافها تتأمله وبكل وقاحه سحب نفس طويل من الزقاره ونفخ نفس الدخان في وجهها.... ثارت كل باركين القهر فيها
وبحركه سريعه اخطفت الزقاره من يده واهي تفز
واقفه وترميها على السيراميك وتدوسها برجلها بانفعال يوسف ماتوقع حركتها ولمى استوعب انها اخذت الزقاره من يده فز واقف مواجه لها ولقط يدها الي اخذت فيها زقارته
وصار يعصر معصمها في كفه : قد الحركه ذي
ارفعت عينها في عينه واهي تقرب وجهها من وجهه بتحدي قطع عليهم المشهد صوت جواد : وش متوقعه من واحد سافل
جاه الرد بصرختين عنيفه انطلقت في نفس الوقت
يوسف : انت تنكتم احسلك
بروق مانست وقاحة جواد عليها العصر : مالك دخل حنا نخلص بينا
ابونادر رفع حاجبه لجواد وابتسم وكانه يقوله تستاهل
الباقين اوصلتهم الرساله من الي صار لجواد واكتفو بالمراقبه
جواد حط رجل على رجل وقعد يتفرج عليهم باحتقار لاالاثنين
يوسف وبروق ماخذ منهم الرد على جواد اكثر من لحظه ارجعو بعدها لساحة المعركه بروق استغلت مقاطعة جواد لهم حتى تسبق بالهجوم اصرخت فيه بقهر : الاساليب الرخيصه الي تستخدمها مع الرخيصات الي من وزنك لاتستخدمها معي
يوسف زاد من ضغطه على معصمها واهي حست انه راح ينكسر في يده من قو الوجع بس تصبرت ماتبيه يتلذذ بوجعها يوسف رد عليها بتهكم :
على الاقل مابعد احد غلفني كهدية شكر
ردةبتهكم مماثل تستفزه رغم الالم الي يتفجر في معصمها من ضغطه عليه : في الواقع الهديه كانت مفخخه وماراح تطول من البروق الاصاعقه تسحق صلتك بعالم حواء للابد
غمزلها بروقان : ويمكن انا الي اسحق صلتك بعالم ادم للابد
بروق اسحبت يدها من يده بقوه واهو تركها ارجعت خطوه لورى مما خلى جواد يتكهن ان السالفه راح تنتهي هنا واهومابعد شفى غليله من يوسف وواضح ان هالبنت تعرف كيف تعطيه من وين مايوجعه نطق بتشره : الشرهه والله على عيال عمك الي خلوك تطلعين من بينهم والاهالسربوت محد يعطيه التفتو عليه بروق ويوسف بحده وكان يوسف اسرع بالرد وكان رده موجه لبروق لان جواد مايعنيله شي رجع يلتفت لها واهو
يتذكر انه سمع طاري ان احد من اعيال عمها يبيهانطق بتحدي: اخذتها من دون اعيال عمها طرق
كلمته كانت طعنه لبروق خلتها تحس ولاول مره انها اجرمت في حق سياف منهو ذا التافه حتى يتفاخر عليه انه اخذها من دونه ولابعد يزعم انه اخذها طرق
طيرة عيونها فيه بقوه ويوسف حس كلمته اصابتها في مقتل ارجعت خطوه ورى واهي تنتفض من الغضب واصرخت عليه واهي تهز اصبعها السبابه في وجهه بقهر : ماخذت غير حبر على ورق وولله اني ابعد لك من البرق الي يلوح في السماء
يوسف انهد عليها بيذبحها على ذا الكلمه لكن
نادر وجواد كانو اسرع منه وتشبثو في ايدينه حاجزينه عنها وهنا ادركت ان صفقتها الرابحه كانت في انها ادخلت في وجه ابو نادر
يوسف زاد قهره اضعاف واهو يشوف اخوه وعمه مربطينه عنها قام ينفظ نفسه منهم بهيجان هستيري لولا قوة الشخصين الي ماسكينه والاكان طارو من قو ماينفظهم عنه اختلطت عليها الاصوات وكلن يتكلم من عنده ماتدري وش يقولون والااهتمت لاي احد منهم كل تركيزها مع النمر الهايج الي يتفلت بكل قوته يبي يوصل لها وطبعا محد من الموجدين يعرف انها مازالت عذرا الااذا كانو افهمو كلامها بنفس المعنى الي اقصدت توصله ليوسف كان يتفلت من ايديهم وهويصرخ بهستريا بابشع انواع السباب والشتايم
: بتندمين على هالكلمه ياحيوانه ياحقيره انا اعلمك كيف اخذك بالطول والعرض حلفت لااندمك
حست بنشوه واهي تشوفه كيف مربط والايقدر يوصل لها تكلمت بتشفي : محد غيرك بيندم وحدك سقط المتاع الي تعرفهم
نادر صرخ فيها بقهر : بااااااااس انقلعي لجناحك والاوالله اني لافكه عليك
يوسف يصرخ على نادر : فكني يارمه فكني ماتسمع الحقيره ذي وش تقول
نادر رغم احتقاره لتصرفات يوسف بس يكره طريقة بروق في الكلام معه بفوقيه واستفزاز تغثه ويتمنى لوتسويها مره واهم الاثنين الحالهم علشان يوسف يمسح فيها البلاط
بروق تدري لو انطلق عليها ماراح يصير لها خير غير ان العائله بأكملها ثارت والكل يصارخ من عنده احد يصارخ على يوسف واحد يصارخ عليها هي واحد يحاول يهدي الوضع
استدارت طالعه من عندهم واول مادخلت جناحها
قفلت الباب وراها ورصت ظهرها عليه واهي تنزع نقابها بسرعه وتفك طرحتها تحس انها اختنقت من كثر القهر الي تحس فيه لازم تتخلص من هاليوسف وبأسرع وقت مستحيل تسمحله يوصل لها بعمرها ماراح تكون رقم يضيفه لعدد حريمه اخذت نفس عميق وازفرته بنفخه واهي تحس بألم فضيع في معصمها ارفعت يدها قدام وجهها وبدت تتفقدها بيدها الثانيه شافت مكان يده محمر مره وبادي ينتفخ التفتت على الباب وراها تعلق نقابها وطرحتها على صف المشاجب المثبته على الباب
نزلت عباتها وعلقتها معهم وراحت للمطبخ افتحت الثلاجه تدور ثلج تكمد فيه معصمها والالقت اتجهة للمغسله افتحت صنبور الماء ودخلت يدها تحت تدفق المويه البارده واهي تدلكها بلطف استمرة دقيقتين ثم سكرة المويه وراحت لغرفة النوم تبدل
ملابسها واهي تحس بحاجه ماسه لممارسة طقوس
التهدئه الي تعودت عليها افتحت دولاب الملابس
واسحبت بجامه مريحه تتوسع فيها وبدت تبدل ولأول مره تقوم بهالطقوس يومين وراء بعض
كانت تمر عليها شهور طويله قبل لاتوصل للحد الي
يحوجها لممارسة هالطقوس البست وارجعت للمطبخ تسوي الهوت شوكلت واهي تحمد ربها انها جابت عدتها الخاصه معها طلعت الكوب الاسود اغسلته وصبت المشروب الساخن فيه
اخذت علبة التشوكلت الغامقه واضافتها للصينيه
وراحت لنفس المكان تبع المره الي راحت نزلت الصينيه على الزوليه الصغيره وجابت المخده نزلتها في الارض واجلست عليها اسحبت جوالها من جيب بنطلونها وشغلت شيله حربيه نزلت الجوال جنبها واخذت
اول حبة شوكلاته واكلتها واهي تذكر كل الي صار بينها وبين يوسف ...... تكرهه تكره فجوره تكره خيانته تكره عدم مبالاته وانحطاط اخلاقه تكره ارتباطها فيه واهو مايستحقها .........هي كثيره على الكفو وشلون عاد الردي؟! ...........بس ماعليه يايوسف اخذتك لسبب والسبب انقضى وبتشوف كيف ارميك مع شباك حياتي بس ماهو قبل تعرف حجمك ماهو قبل اعلم كل واحد رفع خشمه علي من اهلك بسببك منهي بروق ووش تقدر تسوي !!
............تتابعت حبات الشوكلاته لفمها بتتابع رتيب مع كل حبه تتسع افكارها وتغوص في اعماقها اكثر ...... بدا الحماس يدب فيها فجأه مع الفكره الي المعت في ذهنها اخذت الكوب شربت منه رشفه ونزلته بسرعه واخذت جوالها سكرة الشيله وبدت تشتغل عليه بنشاط وعيونها تلمع ببريق المكر والوعيد !!
_________
دخل مع باب الشقه واهو مازال يغلي من الغضب
ركل الكرسي المعترض في طريقه بعنف وكمل
طريقه للكنبه الطويله الموجوده في صدر الصاله رمى نفسه عليها واهو يتكي بمرافقه على اركبه
ويرخي راسه بين اكفوفه واهو يخلل شعره باصابعه
شاد الشعر على ورى .......ممدوح سكر باب الشقه وقفله
وجاء جلس على الكنبه الي جنبه وبتكمله لسوالفهم في السياره : ياخي دامك تبيها ليش تخونها من اول ليله والابعد متعمد انها تعرف بخيانتك
يوسف : وانا وش دراني انها مصيبه كذا دخلتها في بيت ابوي خلت كل شي يطلع من يدي
ممدوح : بس لاتنكر انها بحركتها ذي سوت فيك معروف وردتك لبيت عمي من غير ماتدري ومن غير
لاعمي يعترض او يفرض عليك شروط
يوسف : وفي نفس الوقت ربطتني ياخي انا كف مقدر اعطيها ولد عمك وعمه العله مسوين فيها محامين دفاع
ممدوح ضحك بشماته في يوسف : هههههههه تستاهل على بالك كل البنات مثل الخمه بنت عمك
يوسف كشر بقرف : الله ياخذك انت وبنت عمك معك لاتجيب طاريها
ممدوح بجديه : نصيحه خل عنك بنات ابليس واكسب زوجتك قبل لاتطير من يدك ترا مهوب كل مره بتلقى زوجه مثلها
يوسف بقهر :هالحين خلها تعطيني وجه البنت شايفه نفسها ومتكبره وتناظرني بنص عين الظاهر ان ابوها غاصبها على الزواج
ممدوح باستغراب : ياخي ابوها انسان اخلاق وطيب ماتخيل انه من القشران الي يغصبون بناتهم وبعدين انت ماشفت كيف يتفاخر فيها في العرس شكله معطيها على جوها
يوسف يميل براسه جهت ممدوح : اذا هي ماخذتني برضاها ليه ماحس انها مهتمه بزواجنا البنت والاهي مفكره فيني
ممدوح : ماتقول انها اجلست في بيت عمي وسوت الفلم الهندي الي سوته علشانك ماتصلي اكيد هذا هو السبب
يوسف زفر بضيق : اف اقول قم خلنا نروح لشباب
الليله فيه وجوه جديده قم خل نفلها بلا زواج بلاهم
والعله ذي لاحق عليها وعلى غثاها
_________________________
ادخلت لغرفة همس واهي تشيل في يدينها الثنتين ساندوتش دجاج واضح انه غني بالحشوه من منظر الخس والجبن واصابع البطاطس الي مبينه من جوانب الساندوتش واهي بالكاد مسيطره على الوضع قضمت قطعه من الساندوتش واهي تقترب من اختها الي كشرت بقرف واهي تشوف وسن كيف تمط كل فمها على اوسع شي علشان تقدر تقظم الساندوتش تكلمت بتقزز من منظرها : حشوه ذي والاحمل بتوائم !
وسن اخذت وقت علشان تقدر تبلع الاكل المحشور في فمها وترد : كلمتي غزل
همس عقدت حواجبها بغضب : تراك اقرفتيني بالسالفه ذي كلمتها الظهر وانتهينا والاتحلمين اكلمها مره ثانيه
وسن بقهر : هي مزيونه صدق والابس تقوله علشان تقهرني
همس اظربت الطاوله بيدها بقهر : انا عندي مذاكره ماني فاظيه لغرامياتك وكل الكلام الي عندي قيدني قلته لك وهالحين حلي عني قبل اروح لأبوي واعلمه بهبالك كله ......واصلا يوسف مطلقك بعد ماسفل فيك وسقاك المر يعني بالعربي لايحبك والايبيك استوعبي هالمعلومه وتلاحقي الي بقى من كرامتك
غمضت عيونها بقهر واهي تحس بكلام اختها سكاكين تطعن في قلبها انطقت بصرخه مكبوته تهرب من لوم اختها : خلاص ذاكري دروسك مابي اسمع شي
استدارت طالعه من عند همس واهي تقظم قطعه كبيره من الساندوتش تقطعها باسنانها بحقد وفي نفس الوقت تفكر
انا لازم اشوفها وش الي عجب يوسف فيها وش زودها عني بس كيف اروح اهناك كيف ....هين يايوسف ان ماحرمتك منها زي ماحرمتني من نفسك ومن حبك وقربك ان ماحرقت قلبك زي ماحرقت قلبي ...تذكرت شي واسرعت لغرفتها فكت وحده من ايدينها عن الساندوتش العملاق الي كانت خانقته بين اكفوفها وانهلت نصف الحشوه على الارض
عضت شفتها متذمره من الحوسه الي صارت وفي نفس الوقت مدت يدها بسرعه تفتح الباب حتى ترجع تمسك الساندوتش قبل يمطر ماتبقى منه على الارض دفت الباب برجلها لحد مانفتح على وسعه ونزلت نظرها للحشوه الناجيه بجانب الباب
فكرة هل تلمها او تخليها مكانها ناظرة في ايدينها فشافت انها كلها مشغوله بتقييد ماتبقى من معتقلين متعددي النكهات مابين ضفتي الخبز
دخلت متجاوزه الباب متناسيه امر الدجاج والبطاط وماامتزج بينهم مرمي في الارض
اوصلت للطاوله الموجوده في صالة الجلوس الصغيره الموجوده في جناحها نزلت الساندوتش
عليها باهمال واسحبت مناديل من العلبه الموجوده على نفس الطاوله امسحت ايدينها بالمناديل ورمتها في السله وارجعت للباب تقفله
وهنا بدى الحماس يشتعل في اطرافها فدخلت لغرفة النوم راكضه اتجة للسرير وبدت ترفع مفرش السرير مبعدته عن المرتبه الي تحته وبدت ترفع المرتبه الثقيله من عند نهاية السرير اول مانكشف لها الجزء السفلي من المرتبه مدت يدها لسحاب
بيت المرتبه وافتحته ودخلت يدها لداخله واسحبت كيس ورقي بني متوسط الحجم ابتسمت بانتصار واتركت المرتبه تسقط راجعه لمكانها على السرير وانقزت هي جالسه على السرير تربعت
واقلبت الكيس ناثره محتوياته قدامها واهي تتوعد في يوسف وزوجته : اذا ماكنت لي يايوسف ماراح اخليك لغيري !!
_______________
واقفه قدام التسريحه لابسه ملابس رياضه مريحه
تتمنى لوتقدر تتريض بلبس الرياضه الحاله نفس ماتسوي في بيتهم بس اكيد هالشي راح يبقى مجرد امنيه لان وجود نادر وعمه يلزمها انها تلبس عباتها
البست عبايتها واحكمت لف الطرحه على راسها البست النقاب وانزلت من بعد هوشت البارح ماشافت منهم احد نادوها للعشى واعتذرت عنه .....ماتدري اذا كانو ماخذين منها موقف اولا لكن الأكيد انها ماراح تتنازل عن حقوقها لمجرد انها ترظيهم انزلت تحت والاشافت احد شكلهم ارجعو ينامون بعد الصلاه اتجهة للممشى مباشره وبدت تمشي وترتب افكارها الجناح الي هي فيه محيرها تجهيزه يقول انه جهز لعرسان ......بلاش عرسان .....كلهم عندهم اجنحتهم الخاصه البنات لهم جناح مشترك يوسف له جناح خاص الجناح الرئيسي لام نادر وابونادر ثائر والجد لهم جناح مشترك تحت نادر وجواد لهم جناح مشترك خارج الفيلا بجنب جناح الضيافه اذا كل واحد له مكانه وش عازة ذاك الجناح ؟! هل انهم مجهزينه لزواج احد العيال ؟طيب مين الي جهزوله الجناح والاتزوج؟! غزل قالت لاتسئليني عن مصايب يوسف وانا كنت اسئلها عن الجناح وامنه قالت بقولك قصة الجناح لانك زوجت يوسف ! معناته الجناح ليوسف طيب ليه يجهزون ليوسف جناح عرسان ؟
اكيد انه كان خاطب احد ...اها موب غزل قالت انهم رافضين يخطبون له كيف رافضين يزوجونه وفي نفس الوقت مجهزين له جناح ....طيب يمكن خطب وفك الخطبه وهذا الي خلاهم يرفضون يخطبون له مره ثانيه طيب ......: بسم الله من وين طلعت
ابتسم الواقف قدامها بملابس رياضه وواضح انه جاي يمشي : من جناحي اكيد وش مطلعك صباح الله خير
تجاوزته مكمله مشي ومشى معها موازي لها وتفصلهم مسافه كافيه ردت : متعوده امشي هالوقت
جواد : حلو لقيتلي مرافق في رياضتي الصباحيه
بروق كشرت فهذا اخر واحد تتمنى انها ترافقه
كملت مشي من غير ماترد عليه
جواد : رجلك باقي مارجع من سهرته الصباحي
بروق بحنق : اعتقد انك متعود انه مايرجع هالوقت
فلاتتكلم وكأن الموضوع جديد عليك
جواد بقرف : لاماهو جديد علي بس جديد عليك انتي عروس مالك ثلاثه ايام متزوجه ورجلك يسهر الليل بطوله برا واذا رجع انخمد النهار بطوله
بروق تنرفزت منه : جواد ممكن تتوقف عن بث طاقتك السلبيه في الي حولك ثم انا هنا جايه امشي بصمت !
جواد ابتسم بانتصار بعد ماشاف كيف عصبت اكتفى انه يتقدم عنها في هروله خفيفه ....
بروق ارتاحت انه تقدم عنها وافتكت منه كملت مشي ........اخذت كم لفه على الممشى وادخلت
للفيلا وجواد مازال مستمر ......اصعدت لغرفتها استحمت والبست بنطلون وبلوزه تركت شعرها ينشف براحته من غير استشوار .......راحت لصالة
جناحها رمت نفسها على الكنب المنفرد وبدت تكلم امها وابوها تصبح عليهم خلصت مكالمات
البست عباتها من جديد وانزلت ... اليوم الاحد
واكيد ان الجميع بيكونون على طاولت الطعام
الحين علشان دواماتهم اوصلت تحت وفعلا شافتهم مجتمعين بما فيهم جواد الي مازال بملابس الرياضه اخذت نظره بانوراميه سريعه
عليهم وشافت انه غرور ماهي موجوده واكيد يوسف : صباح الخير
صباح النور
هلا هلا بخويتي الي خلتني
ابتسمت بروق واهي تلتفت على الجد : جدي انا ماتركتك قايله لك من امس حصة الرياضه بعد صلاة الفجر وانا نزلت بعد صلاة الفجر شف عاد مين الي كسل ونام وخلى خويه
الجد ضحك : ههه صادقه انا الي خليت خويتي
انا امشي بس عاد ممشى بعد صلاة الفجر مالي شده عليه
جواد يبتسم لابوه : خلاص راحت عليك صارت خويتي انا
بروق بمزح : والله شكلي بقدم رياضتي قبل صلاة الفجر علشان افتك من خوتك
جواد التفت عليها واهو يبالغ في رسم علامات الصدمه على وجهه والموجودين اضحكو على حركته : افا
ثائر يسوي يده على شكل مسدس ويمثل انه اطلق
رصاصه على جبهة عمه : في منتصف الجبهه
جواد يناظره بتكشيره : بتجيك الملعقه الحين في منتصف العين
ثائر بروقان خم عينه بيده وكانه احذفه صدق : اخ عيني يامجرم
بروق اضحكت واهي تأشر لثائر : هههه شفها طاحت في صحن الزيتون
ثائر بعبط قام يفتش باصبعه بين حبات الزيتون : ماشاء الله من قو سوادها وزينها عجزت افرق بينها وبين حبات الزيتون
نادر : امفارقها الزين
في هالوقت دخل عليهم يوسف شعره مبعثر ووجهه
مرهق وباين عليه التعب جاء يمهم سحب اقرب كرسي يمه وجلس عليه من غير سلام كالعاده
الصمت خيم على الموجودين والنظرات بدت تتجه لبروق الي حست بأهانه توه راجع من سهرته والكل عارف ان هالسهره لاتخلو من خيانته لها
يوسف يناظر فيها ببرود ومافاته نظرات الاحتقار الي ترميه فيها تكلم عادي : انتي ثانويه والاجامعه
بروق رغم غيضها منه ردت بشكل عادي : لاثانوي والاجامعه
غزل الي من عادتها انها تكون خامله الصباح وهذا هو الوقت الوحيد الي يرتاحون فيه من السانها
التفتت على بروق الجالسه جنبها على يمينها
وبدهشه منفعله : ماتدرسين
بروق لفت عليها واهي تميل بضهرها ورى وكأنها
متخرعه : يمه اشتغل الكهرب فجأه
كلهم ضحكو على تعليقها
:ههههههههههههههه
ابتسم يوسف ابتسامه كسوله وبان جماله اكثر وانقهرت بروق وصدت عنه تحس انها تناظر بنت
رغم ان العوائق بينها وبينه لاتعد والاتحصى الاانها
تعتبر هالوجه نصفها
ام نادر اسئلتها باستغراب : ليه ماتدرسين
بروق تذكرة السبب الي اجبرها على تأجيل الدراسه
السنه ذي ردت بشكل عادي : مخلصه الثانويه واجلت الدراسه السنه ذي السنه الجايه ان شاء الله راح اكمل
يوسف ماعجبه انها مأجله الدراسه تكلم بانفعال واهو عاقد حواجبه : وليه تضيعين سنه على الفاضي
بروق ابتسمت وارحمته لانه مكشوف لها بالكامل وتقدر تطعنه بالسكين الي تبي وفي المكان الي تبي بس رحمتها له ماوصلت لدرجة انها ترد عليه من غير تجريح
: موب انا الي تهدر وقتها على الفاضي انا قاعده ادرس اللغه اليابانه عن بعد وانسق مواعيد محاضرات ماما الدور والباقي على الي مضيع كل شي في حياته وعايش كأدات هدم للمجتمع
يوسف وصل عندها في لحظه وحده ومسكها بفكها وصرخ بغيض: انتي واخرتها معك
بروق شافت اثر بوسه على ارقبته وحامت عليها كبدها اكيد الحين جاي على جنابه احساس مقرف
حست فيه ومن غير تردد دفت يده عنها بقرف واهي تحس بغثيان سدت فمها بيدها واهي تدفه
عنها : بعد عني اقرفتني وبصرخه ...بعد
وقامت تركض للمغاسل واهي تحس كبدها بتطلع
مع حلقها من قو الغثيان اوصلت للمغاسل القريبه
منهم وبدت تستفرغ كانو يشوفونها من مكانهم واهي معطيتهم ظهرها ومنحنيه على المغسله وصوت استفراغها واصل لعندهم واهي تتخيل
كم وحده عرفها كم وحده نام معها تحسه كتلة وصخ يمشي على الارض....اهي كاس الماء لاسبقها عليه احد تعافه وشلون كاس مر على الف مخلوق قبلها ...ماتتخيل كمية القذاره المتجمعه فيه . ...اول ماحط يده على فكها من فوق النقاب حست انها تشم ريحة جيفه من يده رغم انه قبل يقوم من مكانه كان عطره واصل لحد عندها..احساس الإشمئزاز والتقزز وصل لاعماقها وقاعد يقلب معدتها مثل المغرفه في قاع القدر ..اعتصرت بطنها بيدها واهي تهوع بشده وتحس بمرارة عصارة المعده واهي تنزل من فمها ... .....تحس ان القذاره متجمعه طبقات على جسمه ...تتخيله مكتسي بمزيج عفن مستخلص من قاع برميل الزباله شي مقرف من قلب ماتقدر تتحمله..... انسان منحط مافي جسمه مكان الاسبق والمسته حرمه غيرها مافيه كلام ممكن يقوله او حتى يخترعه الاوسبق وقاله لعشرات غيرها ...يعني شخص مستهلك بكل المقاييس واهي انسانه عزيزه تعاف نفسها الي في يد غيرها ...........
الي على الطاوله مازالو مذهولين من الي صار وارحمو يوسف لدرجة ان جواد اكثر واحد يتشمت فيه ويفرح بأهانته صد عنه وسوى انه ماشاف شي
يوسف متسمر مكانه مذهول اول مره في حياته تقرف منه بنت تعود ان البنات يفرحون بنظره من عينه وحظنه عندهم يوم عيد حس بأهانه وقهر ماعمره حس بمثله احتار وش يسوي معها ......معقوله قرفانه منه بجد ؟! طيب ليه ؟! هو صحيح ماتروش بعد السهره بس حتى ولو ماهو بوصخ هو مغسل ومتعطر ... معقوله حست بالي قاعد يصير من وراها والا هي حاكمه عليه خالصه
انه يخونها لمجرد انه يسهر الليل كله برا ...........طيب ليه وافقت عليه !! اهو اصلا ماكان متوقع انها بتوافق بعد الي صار في البر بس دامها وافقت ليه ماهي متقبلته ليه نافره منه ليه .؟! الكلمه الاخيره اعلقت في خياله ماقدر يتجرع المها ! ...........
بروق تحس خلاص بتموت بطنها فضى واهي باقي
تهوع وزعت الماء بيدها داخل الغساله تنظفها ثم رشت على يدها رشه من ماء الورد المحطوط في بخاخ على المغسله وحطت يدها على انفها تحاول تهدي الغثيان ...اشوي اشوي بدت
تهدا سكرت المويه واستدارت ماشيه في اتجاههم مرت من عندهم وتجاوزتهم للدرج من غير ماتناظر فيهم يوسف مازال واقف مكانه يتابعها بنظراته
والصدمه مازالت شاله حركته يحس انه تيبس مكانه ....
______________
*
*
*